4. කුලාවකවග්ගො
31. කුලාවකජාතකං
31. කුලාවකා මාතලි සිම්බලිස්මිං, ඊසාමුඛෙන පරිවජ්ජයස්සු;
කාමං චජාම අසුරෙසු පාණං, මා මෙ දිජා වික්කුලවා [මායිමෙ දිජා විකුලාවා (සී. ස්‍යා. පී.)] අහෙසුන්ති.
කුලාවකජාතකං පඨමං.
32. නච්චජාතකං
32. රුදං මනුඤ්ඤං රුචිරා ච පිට්ඨි, වෙළුරියවණ්ණූපනිභා [වණ්ණූපටිභා (ස්‍යා.), වණ්ණසන්නිභා (ක.)] ච ගීවා;
බ්‍යාමමත්තානි ච පෙඛුණානි, නච්චෙන තෙ ධීතරං නො දදාමීති.
නච්චජාතකං දුතියං.
33. සම්මොදමානජාතකං
33. සම්මොදමානා ගච්ඡන්ති, ජාලමාදාය පක්ඛිනො;
යදා තෙ විවදිස්සන්ති, තදා එහින්ති මෙ වසන්ති.
සම්මොදමානජාතකං තතියං.
34. මච්ඡජාතකං
34. න මං සීතං න මං උණ්හං, න මං ජාලස්මි බාධනං;
යඤ්ච මං මඤ්ඤතෙ මච්ඡී, අඤ්ඤං සො රතියා ගතොති.
මච්ඡජාතකං චතුත්ථං.
35. වට්ටකජාතකං
35. සන්ති පක්ඛා අපතනා, සන්ති පාදා අවඤ්චනා;
මාතාපිතා ච නික්ඛන්තා, ජාතවෙද පටික්කමාති.
වට්ටකජාතකං පඤ්චමං.
36. සකුණජාතකං
36. යං නිස්සිතා ජගතිරුහං විහඞ්ගමා, ස්වායං අග්ගිං පමුඤ්චති;
දිසා භජථ වක්කඞ්ගා [වඞ්කඞ්ගා (ස්‍යා.)], ජාතං සරණතො භයන්ති.
සකුණජාතකං ඡට්ඨං.
37. තිත්තිරජාතකං
37. යෙ වුඩ්ඪ [වද්ධ (සී. පී.)] මපචායන්ති, නරා ධම්මස්ස කොවිදා;
දිට්ඨෙව ධම්මෙ පාසංසා, සම්පරායෙ ච සුග්ගතීති.
තිත්තිරජාතකං සත්තමං.
38. බකජාතකං
38. නාච්චන්තං නිකතිප්පඤ්ඤො, නිකත්‍යා සුඛමෙධති;
ආරාධෙති නිකතිප්පඤ්ඤො [ආරාධෙ නිකතිප්පඤ්ඤො (පී.)], බකො කක්කටකාමිවාති.
බකජාතකං අට්ඨමං.
39. නන්දජාතකං
39. මඤ්ඤෙ සොවණ්ණයො රාසි, සොණ්ණමාලා ච නන්දකො;
යත්ථ දාසො ආමජාතො, ඨිතො ථුල්ලානි [ථූලානි (ක.)] ගජ්ජතීති.
නන්දජාතකං නවමං.
40. ඛදිරඞ්ගාරජාතකං
40. කාමං පතාමි නිරයං, උද්ධංපාදො අවංසිරො;
නානරියං කරිස්සාමි, හන්ද පිණ්ඩං පටිග්ගහාති.
ඛදිරඞ්ගාරජාතකං දසමං.
කුලාවකවග්ගො චතුත්ථො.
තස්සුද්දානං –
සිරිමාතලි ධීතර පක්ඛිවරො, රතියාගතො මාතාපිතා ච පුන;
ජගතීරුහ වුඩ්ඪ සුකක්කටකො, තථා නන්දකපිණ්ඩවරෙන දසාති.