3. කුරුඞ්ගවග්ගො
21. කුරුඞ්ගමිගජාතකං
21. ඤාතමෙතං කුරුඞ්ගස්ස, යං ත්වං සෙපණ්ණි සිය්‍යසි [සෙය්‍යසි (සී. ස්‍යා. පී.)];
අඤ්ඤං සෙපණ්ණි ගච්ඡාමි, න මෙ තෙ රුච්චතෙ ඵලන්ති.
කුරුඞ්ගමිගජාතකං පඨමං.
22. කුක්කුරජාතකං
22. යෙ කුක්කුරා රාජකුලම්හි වද්ධා, කොලෙය්‍යකා වණ්ණබලූපපන්නා;
තෙමෙ න වජ්ඣා මයමස්ම වජ්ඣා, නායං සඝච්චා දුබ්බලඝාතිකායන්ති.
කුක්කුරජාතකං දුතියං.
23. ගොජානීයජාතකං
23. අපි පස්සෙන සෙමානො, සල්ලෙභි සල්ලලීකතො;
සෙය්‍යොව වළවා ගොජො [භොජ්ජො (සී.), භොජ්ඣො (ස්‍යා. පී.)], යුඤ්ජ මඤ්ඤෙව සාරථීති.
ගොජානීය [භොජාජානීය (සී. ස්‍යා. පී.)] ජාතකං තතියං.
24. ආජඤ්ඤජාතකං
24. යදා යදා යත්ථ යදා, යත්ථ යත්ථ යදා යදා;
ආජඤ්ඤො කුරුතෙ වෙගං, හායන්ති තත්ථ වාළවාති.
ආජඤ්ඤජාතකං චතුත්ථං.
25. තිත්ථජාතකං
25. අඤ්ඤමඤ්ඤෙහි තිත්ථෙහි, අස්සං පායෙහි සාරථි;
අච්චාසනස්ස පුරිසො, පායාසස්සපි තප්පතීති.
තිත්ථජාතකං පඤ්චමං.
26. මහිළාමුඛජාතකං
26. පුරාණචොරාන වචො නිසම්ම, මහිළාමුඛො පොථයමන්වචාරී;
සුසඤ්ඤතානඤ්හි වචො නිසම්ම, ගජුත්තමො සබ්බගුණෙසු අට්ඨාති.
මහිළාමුඛජාතකං ඡට්ඨං.
27. අභිණ්හජාතකං
27. නාලං කබළං පදාතවෙ, න ච පිණ්ඩං න කුසෙ න ඝංසිතුං;
මඤ්ඤාමි අභිණ්හදස්සනා, නාගො ස්නෙහමකාසි [සිනෙහමකාසි (සී. ස්‍යා. පී.)] කුක්කුරෙති.
අභිණ්හජාතකං සත්තමං.
28. නන්දිවිසාලජාතකං
28. මනුඤ්ඤමෙව භාසෙය්‍ය, නාමනුඤ්ඤං කුදාචනං;
මනුඤ්ඤං භාසමානස්ස, ගරුං භාරං උදද්ධරි;
ධනඤ්ච නං අලාභෙසි, තෙන චත්තමනො අහූති.
නන්දිවිසාලජාතකං අට්ඨමං.
29. කණ්හජාතකං
29. යතො යතො ගරු ධුරං, යතො ගම්භීරවත්තනී;
තදාස්සු කණ්හං යුඤ්ජන්ති, ස්වාස්සු තං වහතෙ ධුරන්ති.
කණ්හජාතකං නවමං.
30. මුනිකජාතකං
30. මා මුනිකස්ස පිහයි, ආතුරන්නානි භුඤ්ජති;
අප්පොස්සුක්කො භුසං ඛාද, එතං දීඝායුලක්ඛණන්ති.
මුනිකජාතකං දසමං.
කුරුඞ්ගවග්ගො තතියො.
තස්සුද්දානං –
කුරුඞ්ගස්ස කුක්කුරගොජවරො, පුන වාළවස්සසිරිව්හයනො [සිරිවයනො (සබ්බත්ථ)];
මහිළාමුඛනාමනුඤ්ඤවරො, වහතෙ ධුර මුනිකෙන දසාති.