3. චම්පෙය්‍යනාගචරියා
20. ‘‘පුනාපරං යදා හොමි, චම්පෙය්‍යකො මහිද්ධිකො;
තදාපි ධම්මිකො ආසිං, සීලබ්බතසමප්පිතො.
21. ‘‘තදාපි මං ධම්මචාරිං, උපවුත්ථං උපොසථං;
අහිතුණ්ඩිකො ගහෙත්වාන, රාජද්වාරම්හි කීළති.
22. ‘‘යං යං සො වණ්ණං චින්තයි, නීලංව පීතලොහිතං;
තස්ස චිත්තානුවත්තන්තො, හොමි චින්තිතසන්නිභො.
23. ‘‘ථලං කරෙය්‍යමුදකං, උදකම්පි ථලං කරෙ;
යදිහං තස්ස පකුප්පෙය්‍යං, ඛණෙන ඡාරිකං කරෙ.
24. ‘‘යදි චිත්තවසී හෙස්සං, පරිහායිස්සාමි සීලතො;
සීලෙන පරිහීනස්ස, උත්තමත්ථො න සිජ්ඣති.
25. ‘‘කාමං භිජ්ජතුයං කායො, ඉධෙව විකිරීයතු;
නෙව සීලං පභින්දෙය්‍යං, විකිරන්තෙ භුසං වියා’’ති.
චම්පෙය්‍යනාගචරියං තතියං.