10. පදුමපුප්ඵියත්ථෙරඅපදානං

51. ‘‘පොක්ඛරවනං පවිට්ඨො, භඤ්ජන්තො පදුමානිහං;

තත්ථද්දසං ඵුස්සං බුද්ධං [අද්දසං ඵුස්සසම්බුද්ධං (සී. ස්‍යා.)], බාත්තිංසවරලක්ඛණං.

52. ‘‘පදුමපුප්ඵං ගහෙත්වාන, ආකාසෙ උක්ඛිපිං අහං;

පාපකම්මං සරිත්වාන, පබ්බජිං අනගාරියං.

53. ‘‘පබ්බජිත්වාන කායෙන, මනසා සංවුතෙන ච;

වචීදුච්චරිතං හිත්වා, ආජීවං පරිසොධයිං.

54. ‘‘ද්වෙනවුතෙ ඉතො කප්පෙ, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

55. ‘‘පදුමාභාසනාමා ච, අට්ඨාරස මහීපතී;

අට්ඨාරසෙසු කප්පෙසු, අට්ඨතාලීසමාසිසුං.

56. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පදුමපුප්ඵියො ථෙරො ඉමා ගාථායො අභාසිත්ථාති;

පදුමපුප්ඵියත්ථෙරස්සාපදානං දසමං.

තිමිරවග්ගො නවමො.