7. සූචිදායකත්ථෙරඅපදානං

30. ‘‘තිංසකප්පසහස්සම්හි, සම්බුද්ධො ලොකනායකො;

සුමෙධො නාම නාමෙන, බාත්තිංසවරලක්ඛණො.

31. ‘‘තස්ස කඤ්චනවණ්ණස්ස, ද්විපදින්දස්ස තාදිනො;

පඤ්ච සූචී මයා දින්නා, සිබ්බනත්ථාය චීවරං.

32. ‘‘තෙනෙව සූචිදානෙන, නිපුණත්ථවිපස්සකං;

තික්ඛං ලහුඤ්ච ඵාසුඤ්ච, ඤාණං මෙ උදපජ්ජථ.

33. ‘‘කිලෙසා ඣාපිතා මය්හං, භවා සබ්බෙ සමූහතා;

ධාරෙමි අන්තිමං දෙහං, සම්මාසම්බුද්ධසාසනෙ.

34. ‘‘ද්විපදාධිපතී නාම, රාජානො චතුරො අහුං;

සත්තරතනසම්පන්නා, චක්කවත්තී මහබ්බලා.

35. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සූචිදායකො ථෙරො ඉමා ගාථායො අභාසිත්ථාති.

සූචිදායකත්ථෙරස්සාපදානං සත්තමං.