8. අම්බදායකත්ථෙරඅපදානං

53. ‘‘අනොමදස්සී භගවා, නිසින්නො පබ්බතන්තරෙ;

මෙත්තාය අඵරි ලොකෙ, අප්පමාණෙ නිරූපධි.

54. ‘‘කපි අහං තදා ආසිං, හිමවන්තෙ නගුත්තමෙ;

දිස්වා අනොමදස්සිං තං [අනොමං අමිතං (සී.), අනොමමධිතං (ස්‍යා.)], බුද්ධෙ චිත්තං පසාදයිං.

55. ‘‘අවිදූරෙ හිමවන්තස්ස, අම්බාසුං ඵලිනො තදා;

තතො පක්කං ගහෙත්වාන, අම්බං සමධුකං අදං.

56. ‘‘තං මෙ බුද්ධො වියාකාසි, අනොමදස්සී මහාමුනි;

ඉමිනා මධුදානෙන, අම්බදානෙන චූභයං.

57. ‘‘සත්තපඤ්ඤාසකප්පම්හි, දෙවලොකෙ රමිස්සති;

අවසෙසෙසු කප්පෙසු, වොකිණ්ණං සංසරිස්සති.

58. ‘‘ඛෙපෙත්වා පාපකං කම්මං, පරිපක්කාය බුද්ධියා;

විනිපාතමගන්ත්වාන, කිලෙසෙ ඣාපයිස්සති.

59. ‘‘දමෙන උත්තමෙනාහං, දමිතොම්හි මහෙසිනා;

පත්තොම්හි අචලං ඨානං, හිත්වා ජයපරාජයං.

60. ‘‘සත්තසත්තතිකප්පසතෙ, අම්බට්ඨජසනාමකා;

චතුද්දස තෙ රාජානො, චක්කවත්තී මහබ්බලා.

61. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා අම්බදායකො ථෙරො ඉමා ගාථායො අභාසිත්ථාති.

අම්බදායකත්ථෙරස්සාපදානං අට්ඨමං.