9. සුමනත්ථෙරඅපදානං

62. ‘‘සුමනො නාම නාමෙන, මාලාකාරො අහං තදා;

අද්දසං විරජං බුද්ධං, ලොකාහුතිපටිග්ගහං.

63. ‘‘උභො හත්ථෙහි පග්ගය්හ, සුමනං පුප්ඵමුත්තමං;

බුද්ධස්ස අභිරොපෙසිං, සිඛිනො ලොකබන්ධුනො.

64. ‘‘ඉමාය පුප්ඵපූජාය, චෙතනාපණිධීහි ච;

දුග්ගතිං නාභිජානාමි, බුද්ධපූජායිදං ඵලං.

65. ‘‘එකත්තිංසෙ ඉතො කප්පෙ, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං [පුප්ඵපූජායිදං (සී.)] ඵලං.

66. ‘‘ඡබ්බීසතිම්හි කප්පම්හි, චත්තාරොසුං මහායසා;

සත්තරතනසම්පන්නා, රාජානො චක්කවත්තිනො.

67. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සුමනො ථෙරො ඉමා ගාථායො අභාසිත්ථාති.

සුමනත්ථෙරස්සාපදානං නවමං.