7. වත්ථදායකත්ථෙරඅපදානං

45. ‘‘පක්ඛිජාතො තදා ආසිං, සුපණ්ණො ගරුළාධිපො;

අද්දසං විරජං බුද්ධං, ගච්ඡන්තං ගන්ධමාදනං.

46. ‘‘ජහිත්වා ගරුළවණ්ණං, මාණවකං අධාරයිං;

එකං වත්ථං මයා දින්නං, ද්විපදින්දස්ස තාදිනො.

47. ‘‘තඤ්ච දුස්සං පටිග්ගය්හ, බුද්ධො ලොකග්ගනායකො;

අන්තලික්ඛෙ ඨිතො සත්ථා, ඉමා ගාථා අභාසථ.

48. ‘‘‘ඉමිනා වත්ථදානෙන, චිත්තස්ස පණිධීහි ච;

පහාය ගරුළං යොනිං, දෙවලොකෙ රමිස්සති’.

49. ‘‘අත්ථදස්සී තු භගවා, ලොකජෙට්ඨො නරාසභො;

වත්ථදානං පසංසිත්වා, පක්කාමි උත්තරාමුඛො.

50. ‘‘භවෙ නිබ්බත්තමානම්හි, හොන්ති මෙ වත්ථසම්පදා;

ආකාසෙ ඡදනං හොති, වත්ථදානස්සිදං ඵලං.

51. ‘‘අරුණවා [අරුණකා (සී.), අරුණසා (ස්‍යා.)] සත්ත ජනා, චක්කවත්තී මහබ්බලා;

ඡත්තිංසතිම්හි ආසිංසු, කප්පම්හි මනුජාධිපා.

52. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා වත්ථදායකො ථෙරො ඉමා ගාථායො අභාසිත්ථාති.

වත්ථදායකත්ථෙරස්සාපදානං සත්තමං.