6. සුචින්තිතත්ථෙරඅපදානං

36. ‘‘ගිරිදුග්ගචරො ආසිං, අභිජාතොව කෙසරී;

මිගසඞ්ඝං වධිත්වාන, ජීවාමි පබ්බතන්තරෙ.

37. ‘‘අත්ථදස්සී තු භගවා, සබ්බඤ්ඤූ වදතං වරො;

මමුද්ධරිතුකාමො සො, ආගච්ඡි පබ්බතුත්තමං.

38. ‘‘පසදඤ්ච මිගං හන්ත්වා, භක්ඛිතුං සමුපාගමිං;

භගවා තම්හි සමයෙ, භික්ඛමානො [සික්ඛාචාරො (ස්‍යා.)] උපාගමි.

39. ‘‘වරමංසානි පග්ගය්හ, අදාසිං තස්ස සත්ථුනො;

අනුමොදි මහාවීරො, නිබ්බාපෙන්තො මමං තදා.

40. ‘‘තෙන චිත්තප්පසාදෙන, ගිරිදුග්ගං පවිසිං අහං;

පීතිං උප්පාදයිත්වාන, තත්ථ කාලඞ්කතො අහං.

41. ‘‘එතෙන මංසදානෙන, චිත්තස්ස පණිධීහි ච;

පන්නරසෙ කප්පසතෙ, දෙවලොකෙ රමිං අහං.

42. ‘‘අවසෙසෙසු කප්පෙසු, කුසලං චින්තිතං [නිචිතං (සී.), කරිතං (ස්‍යා.)] මයා;

තෙනෙව මංසදානෙන, බුද්ධානුස්සරණෙන ච.

43. ‘‘අට්ඨත්තිංසම්හි කප්පම්හි, අට්ඨ දීඝායුනාමකා;

සට්ඨිම්හිතො කප්පසතෙ, දුවෙ වරුණනාමකා [සරණනාමකා (ස්‍යා.)].

44. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සුචින්තිතො ථෙරො ඉමා ගාථායො අභාසිත්ථාති.

සුචින්තිතත්ථෙරස්සාපදානං ඡට්ඨං.