5. භිසදායකත්ථෙරඅපදානං

29. ‘‘වෙස්සභූ නාම නාමෙන, ඉසීනං තතියො අහු;

කානනං වනමොගය්හ, විහාසි පුරිසුත්තමො.

30. ‘‘භිසමුළාලං ගණ්හිත්වා, අගමං බුද්ධසන්තිකං;

තඤ්ච බුද්ධස්ස පාදාසිං, පසන්නො සෙහි පාණිභි.

31. ‘‘කරෙන ච පරාමට්ඨො, වෙස්සභූවරබුද්ධිනා;

සුඛාහං නාභිජානාමි, සමං තෙන කුතොත්තරිං.

32. ‘‘චරිමො වත්තතෙ මය්හං, භවා සබ්බෙ සමූහතා;

හත්ථිනාගෙන සන්තෙන, කුසලං රොපිතං මයා [නාගොව බන්ධනං ඡෙත්වා, විහරාමි අනාසවො (ස්‍යා.)].

33. ‘‘එකත්තිංසෙ ඉතො කප්පෙ, යං කම්මමකරිං තදා;

දුග්ගතිං නාභිජානාමි, භිසදානස්සිදං ඵලං.

34. ‘‘සමොධානා ච රාජානො, සොළස මනුජාධිපා;

කප්පම්හි චුද්දසෙ [තෙරසෙ (සී. ස්‍යා.)] ආසුං, චක්කවත්තී මහබ්බලා.

35. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා භිසදායකො ථෙරො ඉමා ගාථායො අභාසිත්ථාති.

භිසදායකත්ථෙරස්සාපදානං පඤ්චමං.