4. පරප්පසාදකත්ථෙරඅපදානං

20. ‘‘උසභං පවරං වීරං, මහෙසිං විජිතාවිනං;

සුවණ්ණවණ්ණං සම්බුද්ධං, කො දිස්වා නප්පසීදති.

21. ‘‘හිමවාවාපරිමෙය්‍යො, සාගරොව දුරුත්තරො;

තථෙව ඣානං බුද්ධස්ස, කො දිස්වා නප්පසීදති.

22. ‘‘වසුධා යථාප්පමෙය්‍යා, චිත්තා වනවටංසකා;

තථෙව සීලං බුද්ධස්ස, කො දිස්වා නප්පසීදති.

23. ‘‘අනිලඤ්ජසාසඞ්ඛුබ්භො [අනිලජොව අසඞ්ඛොභො (සී.)], යථාකාසො අසඞ්ඛියො;

තථෙව ඤාණං බුද්ධස්ස, කො දිස්වා නප්පසීදති.

24. ‘‘ඉමාහි චතුගාථාහි, බ්‍රාහ්මණො සෙනසව්හයො;

බුද්ධසෙට්ඨං ථවිත්වාන, සිද්ධත්ථං අපරාජිතං.

25. ‘‘චතුන්නවුතිකප්පානි, දුග්ගතිං නුපපජ්ජථ;

සුගතිං සුඛසම්පත්තිං [සුගතීසු සුසුම්පත්තිං (සී. ස්‍යා.)], අනුභොසිමනප්පකං.

26. ‘‘චතුන්නවුතිතො කප්පෙ, ථවිත්වා ලොකනායකං;

දුග්ගතිං නාභිජානාමි, ථොමනාය [ථොමනස්ස (ස්‍යා.)] ඉදං ඵලං.

27. ‘‘චාතුද්දසම්හි කප්පම්හි, චතුරො ආසුමුග්ගතා;

සත්තරතනසම්පන්නා, චක්කවත්තී මහබ්බලා.

28. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පරප්පසාදකො ථෙරො ඉමා ගාථායො අභාසිත්ථාති.

පරප්පසාදකත්ථෙරස්සාපදානං චතුත්ථං.