10. අසනබොධියත්ථෙරඅපදානං

78. ‘‘ජාතියා සත්තවස්සොහං, අද්දසං ලොකනායකං;

පසන්නචිත්තො සුමනො, උපගච්ඡිං නරුත්තමං.

79. ‘‘තිස්සස්සාහං භගවතො, ලොකජෙට්ඨස්ස තාදිනො;

හට්ඨො හට්ඨෙන චිත්තෙන, රොපයිං බොධිමුත්තමං.

80. ‘‘අසනො නාමධෙය්‍යෙන, ධරණීරුහපාදපො;

පඤ්චවස්සෙ පරිචරිං, අසනං බොධිමුත්තමං.

81. ‘‘පුප්ඵිතං පාදපං දිස්වා, අබ්භුතං ලොමහංසනං;

සකං කම්මං පකිත්තෙන්තො, බුද්ධසෙට්ඨං උපාගමිං.

82. ‘‘තිස්සො තදා සො සම්බුද්ධො, සයම්භූ අග්ගපුග්ගලො;

භික්ඛුසඞ්ඝෙ නිසීදිත්වා, ඉමා ගාථා අභාසථ.

83. ‘‘‘යෙනායං රොපිතා බොධි, බුද්ධපූජා ච සක්කතා;

තමහං කිත්තයිස්සාමි, සුණාථ මම භාසතො.

84. ‘‘‘තිංසකප්පානි දෙවෙසු, දෙවරජ්ජං කරිස්සති;

චතුසට්ඨි චක්ඛත්තුං සො, චක්කවත්තී භවිස්සති.

85. ‘‘‘තුසිතා හි චවිත්වාන, සුක්කමූලෙන චොදිතො;

ද්වෙ සම්පත්තී අනුභොත්වා, මනුස්සත්තෙ රමිස්සති.

86. ‘‘‘පධානපහිතත්තො සො, උපසන්තො නිරූපධි;

සබ්බාසවෙ පරිඤ්ඤාය, නිබ්බායිස්සතිනාසවො’.

87. ‘‘විවෙකමනුයුත්තොහං, උපසන්තො නිරූපධි;

නාගොව බන්ධනං ඡෙත්වා, විහරාමි අනාසවො.

88. ‘‘ද්වෙනවුතෙ ඉතො කප්පෙ, බොධිං රොපෙසහං තදා;

දුග්ගතිං නාභිජානාමි, බොධිරොපස්සිදං ඵලං.

89. ‘‘චතුසත්තතිතො කප්පෙ, දණ්ඩසෙනොති විස්සුතො;

සත්තරතනසම්පන්නො, චක්කවත්තී තදා අහුං.

90. ‘‘තෙසත්තතිම්හිතො කප්පෙ, සත්තාහෙසුං මහීපතී;

සමන්තනෙමිනාමෙන, රාජානො චක්කවත්තිනො.

91. ‘‘පණ්ණවීසතිතො කප්පෙ, පුණ්ණකො නාම ඛත්තියො;

සත්තරතනසම්පන්නො, චක්කවත්තී මහබ්බලො.

92. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා අසනබොධියො ථෙරො ඉමා ගාථායො අභාසිත්ථාති.

අසනබොධියත්ථෙරස්සාපදානං දසමං.

බීජනිවග්ගො ඡට්ඨො.