56. යසවග්ගො

1. යසත්ථෙරඅපදානං

1. ‘‘මහාසමුද්දං ඔග්ගය්හ, භවනං මෙ සුනිම්මිතං;

සුනිම්මිතා පොක්ඛරණී, චක්කවාකූපකූජිතා.

2. ‘‘මන්දාරකෙහි සඤ්ඡන්නා, පදුමුප්පලකෙහි ච;

නදී ච සන්දතෙ තත්ථ, සුපතිත්ථා මනොරමා.

3. ‘‘මච්ඡකච්ඡපසඤ්ඡන්නා, නානාදිජසමොත්ථටා [නානාමිගසමොත්ථටා (ස්‍යා.)];

මයූරකොඤ්චාභිරුදා, කොකිලාදීහි වග්ගුහි.

4. ‘‘පාරෙවතා රවිහංසා, චක්කවාකා නදීචරා;

තිත්තිරා සාළිකා චෙත්ථ, පාවකා [සම්බකා (ක.)] ජීවංජීවකා.

5. ‘‘හංසාකොඤ්චාභිනදිතා, කොසියා පිඞ්ගලා [පිඞ්ගලී (සී.), සිඞ්ගලී, සිඞ්ඝලී (ක.)] බහූ;

සත්තරතනසම්පන්නා, මණිමුත්තපවාළිකා.

6. ‘‘සබ්බෙ සොණ්ණමයා රුක්ඛා, නානාඛන්ධසමෙරිතා;

උජ්ජොතෙන්ති දිවාරත්තිං, භවනං සබ්බකාලිකං.

7. ‘‘සට්ඨිතුරියසහස්සානි, සායං පාතො පවජ්ජරෙ;

සොළසිත්ථිසහස්සානි, පරිවාරෙන්ති මං සදා.

8. ‘‘අභිනික්ඛම්ම භවනා, සුමෙධං ලොකනායකං;

පසන්නචිත්තො සුමනො, වන්දයිං තං [සබ්බදස්සිං (ක.)] මහායසං.

9. ‘‘සම්බුද්ධං අභිවාදෙත්වා, සසඞ්ඝං තං නිමන්තයිං;

අධිවාසෙසි සො ධීරො, සුමෙධො ලොකනායකො.

10. ‘‘මම ධම්මකථං කත්වා, උය්‍යොජෙසි මහාමුනි;

සම්බුද්ධං අභිවාදෙත්වා, භවනං මෙ උපාගමිං.

11. ‘‘ආමන්තයිං පරිජනං, සබ්බෙ සන්නිපතුං තදා;

‘පුබ්බණ්හසමයං බුද්ධො, භවනං ආගමිස්සති’.

12. ‘‘‘ලාභා අම්හං සුලද්ධා නො, යෙ වසාම තවන්තිකෙ;

මයම්පි බුද්ධසෙට්ඨස්ස, පූජයිස්සාම සත්ථුනො’.

13. ‘‘අන්නං පානං පට්ඨපෙත්වා, කාලං ආරොචයිං අහං;

වසීසතසහස්සෙහි, උපෙසි ලොකනායකො.

14. ‘‘පඤ්චඞ්ගිකෙහි තුරියෙහි, පච්චුග්ගමමකාසහං;

සබ්බසොණ්ණමයෙ පීඨෙ, නිසීදි පුරිසුත්තමො.

15. ‘‘උපරිච්ඡදනං ආසි, සබ්බසොණ්ණමයං තදා;

බීජනීයො පවායන්ති, භික්ඛුසඞ්ඝං අනුත්තරං.

16. ‘‘පහූතෙනන්නපානෙන, භික්ඛුසඞ්ඝං අතප්පයිං;

පච්චෙකදුස්සයුගලෙ, භික්ඛුසඞ්ඝස්සදාසහං.

17. ‘‘යං වදෙති සුමෙධො සො, ආහුතීනං පටිග්ගහො;

භික්ඛුසඞ්ඝෙ නිසීදිත්වා, ඉමා ගාථා අභාසථ.

18. ‘‘‘යො මං අන්නෙන පානෙන, සබ්බෙ ඉමෙ ච තප්පයි;

තමහං කිත්තයිස්සාමි, සුණාථ මම භාසතො.

19. ‘‘‘අට්ඨාරසෙ කප්පසතෙ, දෙවලොකෙ රමිස්සති;

සහස්සක්ඛත්තුං රාජායං, චක්කවත්තී භවිස්සති.

20. ‘‘‘උපගච්ඡති යං යොනිං, දෙවත්තං අථ මානුසං;

සබ්බසොණ්ණමයං තස්ස, ඡදනං ධාරයිස්සති.

21. ‘‘‘තිංසකප්පසහස්සම්හි, ඔක්කාකකුලසම්භවො;

ගොතමො නාම ගොත්තෙන, සත්ථා ලොකෙ භවිස්සති.

22. ‘‘‘තස්ස ධම්මෙසු දායාදො, ඔරසො ධම්මනිම්මිතො;

සබ්බාසවෙ පරිඤ්ඤාය, නිබ්බායිස්සතිනාසවො.

23. ‘‘‘භික්ඛුසඞ්ඝෙ නිසීදිත්වා, සීහනාදං නදිස්සති’;

චිතකෙ ඡත්තං ධාරෙන්ති, හෙට්ඨා ඡත්තම්හි ඩය්හථ.

24. ‘‘සාමඤ්ඤං මෙ අනුප්පත්තං, කිලෙසා ඣාපිතා මයා;

මණ්ඩපෙ රුක්ඛමූලෙ වා, සන්තාසො මෙ න විජ්ජති.

25. ‘‘තිංසකප්පසහස්සම්හි, යං දානමදදිං තදා;

දුග්ගතිං නාභිජානාමි, සබ්බදානස්සිදං ඵලං.

26. ‘‘කිලෙසා ඣාපිතා මය්හං, භවා සබ්බෙ සමූහතා;

නාගොව බන්ධනං ඡෙත්වා, විහරාමි අනාසවො.

27. ‘‘ස්වාගතං වත මෙ ආසි, මම බුද්ධස්ස සන්තිකෙ;

තිස්සො විජ්ජා අනුප්පත්තා, කතං බුද්ධස්ස සාසනං.

28. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා යසො ථෙරො ඉමා ගාථායො අභාසිත්ථාති.

යසත්ථෙරස්සාපදානං පඨමං.

2. නදීකස්සපත්ථෙරඅපදානං

29. ‘‘පදුමුත්තරස්ස භගවතො, ලොකජෙට්ඨස්ස තාදිනො;

පිණ්ඩචාරං චරන්තස්ස, වාරතො උත්තමං යසං;

අග්ගඵලං ගහෙත්වාන, අදාසිං සත්ථුනො අහං.

30. ‘‘තෙන කම්මෙන දෙවින්දො, ලොකජෙට්ඨො නරාසභො;

සම්පත්තොම්හි අචලං ඨානං, හිත්වා ජයපරාජයං.

31. ‘‘සතසහස්සිතො කප්පෙ, යං ඵලං අදදිං තදා;

දුග්ගතිං නාභිජානාමි, අග්ගදානස්සිදං ඵලං.

32. ‘‘කිලෙසා ඣාපිතා මය්හං…පෙ… විහරාමි අනාසවො.

33. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

34. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා නදීකස්සපො ථෙරො ඉමා ගාථායො

අභාසිත්ථාති.

නදීකස්සපත්ථෙරස්සාපදානං දුතියං.

3. ගයාකස්සපත්ථෙරඅපදානං

35. ‘‘අජිනචම්මවත්ථොහං [අජිනවත්තං නිවත්තොහං (සී.)], ඛාරිභාරධරො තදා;

ඛාරිකං හාරයිත්වාන, කොලං අහාසි අස්සමං.

36. ‘‘භගවා තම්හි සමයෙ, එකො අදුතියො ජිනො;

මමස්සමං උපාගච්ඡි, ජොතෙන්තො සබ්බකාලිකං.

37. ‘‘සකං චිත්තං පසාදෙත්වා, අභිවාදෙත්වාන සුබ්බතං;

උභො හත්ථෙහි පග්ගය්හ, කොලං බුද්ධස්සදාසහං.

38. ‘‘එකතිංසෙ ඉතො කප්පෙ, යං ඵලං අදදිං තදා;

දුග්ගතිං නාභිජානාමි, කොලදානස්සිදං ඵලං.

39. ‘‘කිලෙසා ඣාපිතා මය්හං…පෙ… විහරාමි අනාසවො.

40. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

41. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ගයාකස්සපො ථෙරො ඉමා ගාථායො

අභාසිත්ථාති.

ගයාකස්සපත්ථෙරස්සාපදානං තතියං.

4. කිමිලත්ථෙරඅපදානං

42. ‘‘නිබ්බුතෙ කකුසන්ධම්හි, බ්‍රාහ්මණම්හි වුසීමති;

ගහෙත්වා සලලං මාලං, මණ්ඩපං කාරයිං අහං.

43. ‘‘තාවතිංසං ගතො සන්තො, ලභිම්හ [ලභාමි (ක.)] බ්‍යම්හමුත්තමං;

අඤ්ඤෙ දෙවෙතිරොචාමි, පුඤ්ඤකම්මස්සිදං ඵලං.

44. ‘‘දිවා වා යදි වා රත්තිං, චඞ්කමන්තො ඨිතො චහං;

ඡන්නො සලලපුප්ඵෙහි, පුඤ්ඤකම්මස්සිදං ඵලං.

45. ‘‘ඉමස්මිංයෙව කප්පම්හි, යං බුද්ධමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

46. ‘‘කිලෙසා ඣාපිතා මය්හං…පෙ… විහරාමි අනාසවො.

47. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

48. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා කිමිලො [කිම්බිලො (සී.)] ථෙරො ඉමා ගාථායො

අභාසිත්ථාති.

කිමිලත්ථෙරස්සාපදානං චතුත්ථං.

5. වජ්ජීපුත්තත්ථෙරඅපදානං

49. ‘‘සහස්සරංසී භගවා, සයම්භූ අපරාජිතො;

විවෙකා වුට්ඨහිත්වාන, ගොචරායාභිනික්ඛමි.

50. ‘‘ඵලහත්ථො අහං දිස්වා, උපගච්ඡිං නරාසභං;

පසන්නචිත්තො සුමනො, සවණ්ටං අදදිං ඵලං.

51. ‘‘චතුන්නවුතිතො කප්පෙ, යං ඵලං අදදිං තදා;

දුග්ගතිං නාභිජානාමි, ඵලදානස්සිදං ඵලං.

52. ‘‘කිලෙසා ඣාපිතා මය්හං…පෙ… විහරාමි අනාසවො.

53. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

54. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා වජ්ජීපුත්තො ථෙරො ඉමා ගාථායො

අභාසිත්ථාති.

වජ්ජීපුත්තත්ථෙරස්සාපදානං පඤ්චමං.

6. උත්තරත්ථෙරඅපදානං

55. ‘‘සුමෙධො නාම සම්බුද්ධො, බාත්තිංසවරලක්ඛණො;

විවෙකකාමො භගවා, හිමවන්තමුපාගමි.

56. ‘‘අජ්ඣොගාහෙත්වා හිමවන්තං, අග්ගො කාරුණිකො මුනි;

පල්ලඞ්කං ආභුජිත්වාන, නිසීදි පුරිසුත්තමො.

57. ‘‘විජ්ජධරො තදා ආසිං, අන්තලික්ඛචරො අහං;

තිසූලං සුගතං ගය්හ, ගච්ඡාමි අම්බරෙ තදා.

58. ‘‘පබ්බතග්ගෙ යථා අග්ගි, පුණ්ණමායෙව චන්දිමා;

වනං ඔභාසතෙ බුද්ධො, සාලරාජාව ඵුල්ලිතො.

59. ‘‘වනග්ගා නික්ඛමිත්වාන, බුද්ධරංසීභිධාවරෙ [බුද්ධරංසී විධාවරෙ (සී. ක.)];

නළග්ගිවණ්ණසඞ්කාසා [නළග්ගිව නසඞ්කාසං (සී.)], දිස්වා චිත්තං පසාදයිං.

60. ‘‘විචිනං අද්දසං පුප්ඵං, කණිකාරං දෙවගන්ධිකං;

තීණි පුප්ඵානි ආදාය, බුද්ධසෙට්ඨමපූජයිං.

61. ‘‘බුද්ධස්ස ආනුභාවෙන, තීණි පුප්ඵානි මෙ තදා;

උද්ධං වණ්ටා අධොපත්තා, ඡායං කුබ්බන්ති සත්ථුනො.

62. ‘‘තෙන කම්මෙන සුකතෙන, චෙතනාපණිධීහි ච;

ජහිත්වා මානුසං දෙහං තාවතිංසමගච්ඡහං.

63. ‘‘තත්ථ මෙ සුකතං බ්‍යම්හං, කණිකාරීති [කණිකාරොති (සී.)] ඤායති;

සට්ඨියොජනමුබ්බෙධං, තිංසයොජනවිත්ථතං.

64. ‘‘සහස්සකණ්ඩං සතභෙණ්ඩු, ධජාලු හරිතාමයං;

සතසහස්සනිය්‍යූහා [සතසහස්සානි බ්‍යූහානි (සී.)], බ්‍යම්හෙ පාතුභවිංසු [පාතුරහංසු (සී.), පාතුරහිංසු (ක.)] මෙ.

65. ‘‘සොණ්ණමයා මණිමයා, ලොහිතඞ්කමයාපි ච;

ඵලිකාපි ච පල්ලඞ්කා, යෙනිච්ඡකා යදිච්ඡකා.

66. ‘‘මහාරහඤ්ච සයනං, තූලිකා විකතීයුතං;

උද්ධලොමිඤ්ච එකන්තං, බිම්බොහනසමායුතං.

67. ‘‘භවනා නික්ඛමිත්වාන, චරන්තො දෙවචාරිකං;

යථා ඉච්ඡාමි [යථා ගච්ඡාමි (සී.)] ගමනං, දෙවසඞ්ඝපුරක්ඛතො.

68. ‘‘පුප්ඵස්ස හෙට්ඨා තිට්ඨාමි, උපරිච්ඡදනං මම;

සමන්තා යොජනසතං, කණිකාරෙහි ඡාදිතං.

69. ‘‘සට්ඨිතුරියසහස්සානි, සායපාතං උපට්ඨහුං;

පරිවාරෙන්ති මං නිච්චං, රත්තින්දිවමතන්දිතා.

70. ‘‘තත්ථ නච්චෙහි ගීතෙහි, තාලෙහි වාදිතෙහි ච;

රමාමි ඛිඩ්ඩා රතියා, මොදාමි කාමකාමහං.