1. භාගිනෙය්‍යුපාලිත්ථෙරඅපදානං

1. ‘‘ඛීණාසවසහස්සෙහි, පරිවුතො [පරෙතො (ක. අට්ඨ)] ලොකනායකො;

විවෙකමනුයුත්තො සො, ගච්ඡතෙ පටිසල්ලිතුං.

2. ‘‘අජිනෙන නිවත්ථොහං, තිදණ්ඩපරිධාරකො;

භික්ඛුසඞ්ඝපරිබ්‍යූළ්හං, අද්දසං ලොකනායකං.

3. ‘‘එකංසං අජිනං කත්වා, සිරෙ කත්වාන අඤ්ජලිං;

සම්බුද්ධං අභිවාදෙත්වා, සන්ථවිං ලොකනායකං.

4. ‘‘යථාණ්ඩජා ච සංසෙදා, ඔපපාතී ජලාබුජා;

කාකාදිපක්ඛිනො සබ්බෙ, අන්තලික්ඛචරා සදා.

5. ‘‘යෙ කෙචි පාණභූතත්ථි, සඤ්ඤිනො වා අසඤ්ඤිනො;

සබ්බෙ තෙ තව ඤාණම්හි, අන්තො හොන්ති සමොගධා.

6. ‘‘ගන්ධා ච පබ්බතෙය්‍යා යෙ, හිමවන්තනගුත්තමෙ;

සබ්බෙ තෙ තව සීලම්හි, කලායපි න යුජ්ජරෙ.

7. ‘‘මොහන්ධකාරපක්ඛන්දො, අයං ලොකො සදෙවකො;

තව ඤාණම්හි ජොතන්තෙ, අන්ධකාරා විධංසිතා.

8. ‘‘යථා අත්ථඞ්ගතෙ සූරියෙ, හොන්ති සත්තා තමොගතා;

එවං බුද්ධෙ අනුප්පන්නෙ, හොති ලොකො තමොගතො.

9. ‘‘යථොදයන්තො ආදිච්චො, විනොදෙති තමං සදා;

තථෙව ත්වං බුද්ධසෙට්ඨ, විද්ධංසෙසි තමං සදා.

10. ‘‘පධානපහිතත්තොසි, බුද්ධො ලොකෙ සදෙවකෙ;

තව කම්මාභිරද්ධෙන, තොසෙසි ජනතං බහුං.

11. ‘‘තං සබ්බං අනුමොදිත්වා, පදුමුත්තරො මහාමුනි;

නභං අබ්භුග්ගමී ධීරො, හංසරාජාව අම්බරෙ.

12. ‘‘අබ්භුග්ගන්ත්වාන සම්බුද්ධො, මහෙසි පදුමුත්තරො;

අන්තලික්ඛෙ ඨිතො සත්ථා, ඉමා ගාථා අභාසථ.

13. ‘‘යෙනිදං ථවිතං ඤාණං, ඔපම්මෙහි සමායුතං;

තමහං කිත්තයිස්සාමි, සුණාථ මම භාසතො.

14. ‘‘‘අට්ඨාරසඤ්ච ඛත්තුං සො, දෙවරාජා භවිස්සති;

පථබ්‍යා රජ්ජං තිසතං, වසුධං ආවසිස්සති.

15. ‘‘‘පඤ්චවීසතික්ඛත්තුඤ්ච, චක්කවත්තී භවිස්සති;

පදෙසරජ්ජං විපුලං, ගණනාතො අසඞ්ඛියං.

16. ‘‘‘කප්පසතසහස්සම්හි, ඔක්කාකකුලසම්භවො;

ගොතමො නාම ගොත්තෙන, සත්ථා ලොකෙ භවිස්සති.

17. ‘‘‘තුසිතා හි චවිත්වාන, සුක්කමූලෙන චොදිතො;

හීනොව ජාතියා සන්තො, උපාලි නාම හෙස්සති.

18. ‘‘‘සො පච්ඡා පබ්බජිත්වාන, විරාජෙත්වාන පාපකං;

සබ්බාසවෙ පරිඤ්ඤාය, නිබ්බායිස්සතිනාසවො.

19. ‘‘‘තුට්ඨො ච ගොතමො බුද්ධො, සක්‍යපුත්තො මහායසො;

විනයාධිගතං තස්ස, එතදග්ගෙ ඨපෙස්සති’.

20. ‘‘සද්ධායාහං පබ්බජිතො, කතකිච්චො අනාසවො;

සබ්බාසවෙ පරිඤ්ඤාය, විහරාමි අනාසවො.

21. ‘‘භගවා චානුකම්පී මං, විනයෙහං විසාරදො;

සකකම්මාභිරද්ධො ච, විහරාමි අනාසවො.

22. ‘‘සංවුතො පාතිමොක්ඛම්හි, ඉන්ද්‍රියෙසු ච පඤ්චසු;

ධාරෙමි විනයං සබ්බං, කෙවලං රතනාකරං [රතනග්ඝරං (ක.)].

23. ‘‘මමඤ්ච ගුණමඤ්ඤාය, සත්ථා ලොකෙ අනුත්තරො;

භික්ඛුසඞ්ඝෙ නිසීදිත්වා, එතදග්ගෙ ඨපෙසි මං.

24. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා උපාලිථෙරො ඉමා ගාථායො අභාසිත්ථාති.

භාගිනෙය්‍යුපාලිත්ථෙරස්සාපදානං පඨමං.