9. ධම්මරුචියත්ථෙරඅපදානං

164. ‘‘යදා දීපඞ්කරො බුද්ධො, සුමෙධං බ්‍යාකරී ජිනො;

‘අපරිමෙය්‍යෙ ඉතො කප්පෙ, අයං බුද්ධො භවිස්සති.

165. ‘‘‘ඉමස්ස ජනිකා මාතා, මායා නාම භවිස්සති;

පිතා සුද්ධොදනො නාම, අයං හෙස්සති ගොතමො.

166. ‘‘‘පධානං පදහිත්වාන, කත්වා දුක්කරකාරිකං;

අස්සත්ථමූලෙ සම්බුද්ධො, බුජ්ඣිස්සති මහායසො.

167. ‘‘‘උපතිස්සො කොලිතො ච, අග්ගා හෙස්සන්ති සාවකා;

ආනන්දො නාම නාමෙන [ආනන්දො නාමුපට්ඨාකො (ස්‍යා.)], උපට්ඨිස්සතිමං ජිනං.

168. ‘‘‘ඛෙමා උප්පලවණ්ණා ච, අග්ගා හෙස්සන්ති සාවිකා;

චිත්තො ආළවකො චෙව, අග්ගා හෙස්සන්තුපාසකා.

169. ‘‘‘ඛුජ්ජුත්තරා නන්දමාතා, අග්ගා හෙස්සන්තුපාසිකා;

බොධි ඉමස්ස වීරස්ස, අස්සත්ථොති පවුච්චති’.

170. ‘‘ඉදං සුත්වාන වචනං, අසමස්ස මහෙසිනො;

ආමොදිතා නරමරූ, නමස්සන්ති කතඤ්ජලී.

171. ‘‘තදාහං මාණවො ආසිං, මෙඝො නාම සුසික්ඛිතො;

සුත්වා බ්‍යාකරණං සෙට්ඨං, සුමෙධස්ස මහාමුනෙ.

172. ‘‘සංවිසට්ඨො භවිත්වාන, සුමෙධෙ කරුණාසයෙ [කරුණාලයෙ (ස්‍යා.)];

පබ්බජන්තඤ්ච තං වීරං, සහාව අනුපබ්බජිං.

173. ‘‘සංවුතො පාතිමොක්ඛස්මිං, ඉන්ද්‍රියෙසු ච පඤ්චසු;

සුද්ධාජීවො සතො වීරො, ජිනසාසනකාරකො.

174. ‘‘එවං විහරමානොහං, පාපමිත්තෙන කෙනචි;

නියොජිතො අනාචාරෙ, සුමග්ගා පරිධංසිතො.

175. ‘‘විතක්කවසිකො හුත්වා, සාසනතො අපක්කමිං;

පච්ඡා තෙන කුමිත්තෙන, පයුත්තො මාතුඝාතනං.

176. ‘‘අකරිං ආනන්තරියං [අකරිං නන්තරියඤ්ච (ස්‍යා. ක.)], ඝාතයිං දුට්ඨමානසො;

තතො චුතො මහාවීචිං, උපපන්නො සුදාරුණං.

177. ‘‘විනිපාතගතො සන්තො, සංසරිං දුක්ඛිතො චිරං;

න පුනො අද්දසං වීරං, සුමෙධං නරපුඞ්ගවං.

178. ‘‘අස්මිං කප්පෙ සමුද්දම්හි, මච්ඡො ආසිං තිමිඞ්ගලො;

දිස්වාහං සාගරෙ නාවං, ගොචරත්ථමුපාගමිං.

179. ‘‘දිස්වා මං වාණිජා භීතා, බුද්ධසෙට්ඨමනුස්සරුං;

ගොතමොති මහාඝොසං, සුත්වා තෙහි උදීරිතං.

180. ‘‘පුබ්බසඤ්ඤං සරිත්වාන, තතො කාලඞ්කතො අහං;

සාවත්ථියං කුලෙ ඉද්ධෙ, ජාතො බ්‍රාහ්මණජාතියං.

181. ‘‘ආසිං ධම්මරුචි නාම, සබ්බපාපජිගුච්ඡකො;

දිස්වාහං ලොකපජ්ජොතං, ජාතියා සත්තවස්සිකො.

182. ‘‘මහාජෙතවනං ගන්ත්වා, පබ්බජිං අනගාරියං;

උපෙමි බුද්ධං තික්ඛත්තුං, රත්තියා දිවසස්ස ච.

183. ‘‘තදා දිස්වා මුනි ආහ, චිරං ධම්මරුචීති මං;

තතොහං අවචං බුද්ධං, පුබ්බකම්මපභාවිතං.

184. ‘‘සුචිරං සතපුඤ්ඤලක්ඛණං, පතිපුබ්බෙන විසුද්ධපච්චයං;

අහමජ්ජසුපෙක්ඛනං වත, තව පස්සාමි නිරුපමං විග්ගහං [නිරූපමග්ගහං (සී.)].

185. ‘‘සුචිරං විහතත්තමො මයා, සුචිරක්ඛෙන නදී විසොසිතා;

සුචිරං අමලං විසොධිතං, නයනං ඤාණමයං මහාමුනෙ.

186. ‘‘චිරකාලසමඞ්ගිතො [චිරකාලං සමාගතො (පී.)] තයා, අවිනට්ඨො පුනරන්තරං චිරං;

පුනරජ්ජසමාගතො තයා, න හි නස්සන්ති කතානි ගොතම.

187. ‘‘කිලෙසා ඣාපිතා මය්හං…පෙ… විහරාමි අනාසවො.

188. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

189. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ධම්මරුචියො ථෙරො ඉමා ගාථායො

අභාසිත්ථාති.

ධම්මරුචියත්ථෙරස්සාපදානං නවමං.