5. චන්දනමාලියත්ථෙරඅපදානං

75. ‘‘පඤ්ච කාමගුණෙ හිත්වා, පියරූපෙ මනොරමෙ;

අසීතිකොටියො හිත්වා, පබ්බජිං අනගාරියං.

76. ‘‘පබ්බජිත්වාන කායෙන, පාපකම්මං විවජ්ජයිං;

වචීදුච්චරිතං හිත්වා, නදීකූලෙ වසාමහං.

77. ‘‘එකකං මං විහරන්තං, බුද්ධසෙට්ඨො උපාගමි;

නාහං ජානාමි බුද්ධොති, අකාසිං පටිසන්ථරං [පටිසන්ධාරං (ක.)].

78. ‘‘කරිත්වා පටිසන්ථාරං, නාමගොත්තමපුච්ඡහං;

‘දෙවතානුසි ගන්ධබ්බො, අදු සක්කො පුරින්දදො.

79. ‘‘‘කො වා ත්වං කස්ස වා පුත්තො, මහාබ්‍රහ්මා ඉධාගතො;

විරොචෙසි දිසා සබ්බා, උදයං සූරියො යථා.

80. ‘‘‘සහස්සාරානි චක්කානි, පාදෙ දිස්සන්ති මාරිස;

කො වා ත්වං කස්ස වා පුත්තො, කථං ජානෙමු තං මයං;

නාමගොත්තං පවෙදෙහි, සංසයං අපනෙහි මෙ’.

81. ‘‘‘නම්හි දෙවො න ගන්ධබ්බො, නම්හි [නාපි (සී.)] සක්කො පුරින්දදො;

බ්‍රහ්මභාවො ච මෙ නත්ථි, එතෙසං උත්තමො අහං.

82. ‘‘‘අතීතො විසයං තෙසං, දාලයිං කාමබන්ධනං;

සබ්බෙ කිලෙසෙ ඣාපෙත්වා, පත්තො සම්බොධිමුත්තමං’.

83. ‘‘තස්ස වාචං සුණිත්වාහං, ඉදං වචනමබ්‍රවිං;

‘යදි බුද්ධොති සබ්බඤ්ඤූ, නිසීද ත්වං මහාමුනෙ.

84. ‘තමහං පූජයිස්සාමි, දුක්ඛස්සන්තකරො තුවං’;

‘‘පත්ථරිත්වා ජිනචම්මං, අදාසි සත්ථුනො අහං.

85. ‘‘නිසීදි තත්ථ භගවා, සීහොව ගිරිගබ්භරෙ;

ඛිප්පං පබ්බතමාරුය්හ, අම්බස්ස ඵලමග්ගහිං.

86. ‘‘සාලකල්‍යාණිකං පුප්ඵං, චන්දනඤ්ච මහාරහං;

ඛිප්පං පග්ගය්හ තං සබ්බං, උපෙත්වා ලොකනායකං.

87. ‘‘ඵලං බුද්ධස්ස දත්වාන, සාලපුප්ඵමපූජයිං;

චන්දනං අනුලිම්පිත්වා, අවන්දිං සත්ථුනො අහං.

88. ‘‘පසන්නචිත්තො සුමනො, විපුලාය ච පීතියා;

අජිනම්හි නිසීදිත්වා, සුමෙධො ලොකනායකො.

89. ‘‘මම කම්මං පකිත්තෙසි, හාසයන්තො මමං තදා;

‘ඉමිනා ඵලදානෙන, ගන්ධමාලෙහි චූභයං.

90. ‘‘‘පඤ්චවීසෙ කප්පසතෙ, දෙවලොකෙ රමිස්සති;

අනූනමනසඞ්කප්පො, වසවත්තී භවිස්සති.

91. ‘‘‘ඡබ්බීසතිකප්පසතෙ, මනුස්සත්තං ගමිස්සති;

භවිස්සති චක්කවත්තී, චාතුරන්තො මහිද්ධිකො.

92. ‘‘‘වෙභාරං නාම නගරං, විස්සකම්මෙන මාපිතං;

හෙස්සති සබ්බසොවණ්ණං, නානාරතනභූසිතං.

93. ‘‘‘එතෙනෙව උපායෙන, සංසරිස්සති සො භවෙ [යොනිසො (ස්‍යා. පී.)];

සබ්බත්ථ පූජිතො හුත්වා, දෙවත්තෙ අථ මානුසෙ.

94. ‘‘‘පච්ඡිමෙ භවෙ සම්පත්තෙ, බ්‍රහ්මබන්ධු භවිස්සති;

අගාරා අභිනික්ඛම්ම, අනගාරී භවිස්සති;

අභිඤ්ඤාපාරගූ හුත්වා, නිබ්බායිස්සතිනාසවො’.

95. ‘‘ඉදං වත්වාන සම්බුද්ධො, සුමෙධො ලොකනායකො;

මම නිජ්ඣායමානස්ස, පක්කාමි අනිලඤ්ජසෙ.

96. ‘‘තෙන කම්මෙන සුකතෙන, චෙතනාපණිධීහි ච;

ජහිත්වා මානුසං දෙහං, තාවතිංසමගච්ඡහං.

97. ‘‘තුසිතතො චවිත්වාන, නිබ්බත්තිං මාතුකුච්ඡියං;

භොගෙ මෙ ඌනතා නත්ථි, යම්හි ගබ්භෙ වසාමහං.

98. ‘‘මාතුකුච්ඡිගතෙ මයි, අන්නපානඤ්ච භොජනං;

මාතුයා මම ඡන්දෙන, නිබ්බත්තති යදිච්ඡකං.

99. ‘‘ජාතියා පඤ්චවස්සෙන, පබ්බජිං අනගාරියං;

ඔරොපිතම්හි කෙසම්හි, අරහත්තමපාපුණිං.

100. ‘‘පුබ්බකම්මං ගවෙසන්තො, ඔරෙන නාද්දසං අහං;

තිංසකප්පසහස්සම්හි, මම කම්මමනුස්සරිං.

101. ‘‘නමො තෙ පුරිසාජඤ්ඤ, නමො තෙ පුරිසුත්තම;

තව සාසනමාගම්ම, පත්තොම්හි අචලං පදං.

102. ‘‘තිංසකප්පසහස්සම්හි, යං බුද්ධමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

103. ‘‘කිලෙසා ඣාපිතා මය්හං…පෙ… විහරාමි අනාසවො.

104. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

105. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා චන්දනමාලියො ථෙරො ඉමා ගාථායො

අභාසිත්ථාති.

චන්දනමාලියත්ථෙරස්සාපදානං පඤ්චමං.