3. භිසදායකත්ථෙරඅපදානං

27. ‘‘ඔගය්හ යං [ඔගය්හාහං (සී. ස්‍යා. පී.)] පොක්ඛරණිං, නානාකුඤ්ජරසෙවිතං;

උද්ධරාමි භිසං තත්ථ, ඝාසහෙතු [අසනහෙතු (ස්‍යා.)] අහං තදා.

28. ‘‘භගවා තම්හි සමයෙ, පදුමුත්තරසව්හයො;

රත්තම්බරධරො [රත්තකම්බලධරො (ස්‍යා.)] බුද්ධො, ගච්ඡති අනිලඤ්ජසෙ.

29. ‘‘ධුනන්තො පංසුකූලානි, සද්දමස්සොසහං තදා;

උද්ධං නිජ්ඣායමානොහං, අද්දසං ලොකනායකං.

30. ‘‘තත්ථෙව ඨිතකො සන්තො, ආයාචිං ලොකනායකං;

මධුං භිසෙහි සවති, ඛීරං සප්පිං මුළාලිභි.

31. ‘‘පටිග්ගණ්හාතු මෙ බුද්ධො, අනුකම්පාය චක්ඛුමා;

තතො කාරුණිකො සත්ථා, ඔරුහිත්වා මහායසො.

32. ‘‘පටිග්ගණ්හි මමං භික්ඛං, අනුකම්පාය චක්ඛුමා;

පටිග්ගහෙත්වා සම්බුද්ධො, අකා මෙ අනුමොදනං.

33. ‘‘‘සුඛී හොතු [හොහි (සී. ස්‍යා. පී. ක.)] මහාපුඤ්ඤ, ගති තුය්හං සමිජ්ඣතු;

ඉමිනා භිසදානෙන, ලභස්සු විපුලං සුඛං’.

34. ‘‘ඉදං වත්වාන සම්බුද්ධො, ජලජුත්තමනාමකො;

භික්ඛමාදාය සම්බුද්ධො, අම්බරෙනාගමා ජිනො.

35. ‘‘තතො භිසං ගහෙත්වාන, ආගච්ඡිං මම අස්සමං;

භිසං රුක්ඛෙ ලගෙත්වාන [ලග්ගිත්වාන (ස්‍යා. ක.)], මම දානමනුස්සරිං.

36. ‘‘මහාවාතො වුට්ඨහිත්වා, සඤ්චාලෙසි වනං තදා;

ආකාසො අභිනාදිත්ථ, අසනියා ඵලන්තියා.

37. ‘‘තතො මෙ අසනිපාතො, මත්ථකෙ නිපතී තදා;

සොහං නිසින්නකො සන්තො, තත්ථ කාලඞ්කතො අහුං.

38. ‘‘පුඤ්ඤකම්මෙන සංයුත්තො, තුසිතං උපපජ්ජහං;

කළෙවරං මෙ පතිතං, දෙවලොකෙ රමිං අහං.

39. ‘‘ඡළසීතිසහස්සානි, නාරියො සමලඞ්කතා;

සායපාතං [සායං පාතං (ස්‍යා. ක.)] උපට්ඨන්ති, භිසදානස්සිදං ඵලං.

40. ‘‘මනුස්සයොනිමාගන්ත්වා, සුඛිතො හොමහං සදා;

භොගෙ මෙ ඌනතා නත්ථි, භිසදානස්සිදං ඵලං.

41. ‘‘අනුකම්පිතකො තෙන, දෙවදෙවෙන තාදිනා;

සබ්බාසවා පරික්ඛීණා, නත්ථි දානි පුනබ්භවො.

42. ‘‘සතසහස්සිතො කප්පෙ, යං භිසං [භික්ඛං (සබ්බත්ථ)] අදදිං තදා;

දුග්ගතිං නාභිජානාමි, භිසදානස්සිදං ඵලං.

43. ‘‘කිලෙසා ඣාපිතා මය්හං…පෙ… විහරාමි අනාසවො.

44. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

45. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා භිසදායකො ථෙරො ඉමා ගාථායො

අභාසිත්ථාති.

භිසදායකත්ථෙරස්සාපදානං තතියං.