7. උච්ඡඞ්ගපුප්ඵියත්ථෙරඅපදානං

142. ‘‘නගරෙ බන්ධුමතියා, අහොසිං මාලිකො තදා;

උච්ඡඞ්ගං පූරයිත්වාන, අගමං අන්තරාපණං.

143. ‘‘භගවා තම්හි සමයෙ, භික්ඛුසඞ්ඝපුරක්ඛතො;

මහතා ආනුභාවෙන, නිය්‍යාති ලොකනායකො.

144. ‘‘දිස්වාන ලොකපජ්ජොතං, විපස්සිං ලොකතාරණං;

පුප්ඵං පග්ගය්හ උච්ඡඞ්ගා, බුද්ධසෙට්ඨං අපූජයිං.

145. ‘‘එකනවුතිතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

146. ‘‘කිලෙසා ඣාපිතා මය්හං…පෙ… විහරාමි අනාසවො.

147. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

148. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා උච්ඡඞ්ගපුප්ඵියො ථෙරො ඉමා ගාථායො අභාසිත්ථාති.

උච්ඡඞ්ගපුප්ඵියත්ථෙරස්සාපදානං සත්තමං.