5. පදුමකූටාගාරියත්ථෙරඅපදානං

353. ‘‘පියදස්සී නාම භගවා, සයම්භූ ලොකනායකො;

විවෙකකාමො සම්බුද්ධො, සමාධිකුසලො මුනි.

354. ‘‘වනසණ්ඩං සමොගය්හ, පියදස්සී මහාමුනි;

පංසුකූලං පත්ථරිත්වා, නිසීදි පුරිසුත්තමො.

355. ‘‘මිගලුද්දො පුරෙ ආසිං, අරඤ්ඤෙ [විපිනෙ (සී.), ඉරිනෙ (ස්‍යා. ක.)] කානනෙ අහං;

පසදං මිගමෙසන්තො, ආහිණ්ඩාමි අහං තදා.

356. ‘‘තත්ථද්දසාසිං සම්බුද්ධං, ඔඝතිණ්ණමනාසවං;

පුප්ඵිතං සාලරාජංව, සතරංසිංව උග්ගතං.

357. ‘‘දිස්වානහං දෙවදෙවං, පියදස්සිං මහායසං;

ජාතස්සරං සමොගය්හ, පදුමං ආහරිං තදා.

358. ‘‘ආහරිත්වාන පදුමං, සතපත්තං මනොරමං;

කූටාගාරං කරිත්වාන, ඡාදයිං පදුමෙනහං.

359. ‘‘අනුකම්පකො කාරුණිකො, පියදස්සී මහාමුනි;

සත්තරත්තින්දිවං බුද්ධො, කූටාගාරෙ වසී ජිනො.

360. ‘‘පුරාණං ඡඩ්ඩයිත්වාන, නවෙන ඡාදයිං අහං;

අඤ්ජලිං පග්ගහෙත්වාන, අට්ඨාසිං තාවදෙ අහං.

361. ‘‘වුට්ඨහිත්වා සමාධිම්හා, පියදස්සී මහාමුනි;

දිසං අනුවිලොකෙන්තො, නිසීදි ලොකනායකො.

362. ‘‘තදා සුදස්සනො නාම, උපට්ඨාකො මහිද්ධිකො;

චිත්තමඤ්ඤාය බුද්ධස්ස, පියදස්සිස්ස සත්ථුනො.

363. ‘‘අසීතියා සහස්සෙහි, භික්ඛූහි පරිවාරිතො;

වනන්තෙ සුඛමාසීනං, උපෙසි ලොකනායකං.

364. ‘‘යාවතා වනසණ්ඩම්හි, අධිවත්ථා ච දෙවතා;

බුද්ධස්ස චිත්තමඤ්ඤාය, සබ්බෙ සන්නිපතුං තදා.

365. ‘‘සමාගතෙසු යක්ඛෙසු, කුම්භණ්ඩෙ සහරක්ඛසෙ;

භික්ඛුසඞ්ඝෙ ච සම්පත්තෙ, ගාථා පබ්‍යාහරී [සබ්‍යාහරී (ස්‍යා.), මාබ්‍යාහරී (සී.)] ජිනො.

366. ‘‘‘යො මං සත්තාහං පූජෙසි, ආවාසඤ්ච අකාසි මෙ;

තමහං කිත්තයිස්සාමි, සුණාථ මම භාසතො.

367. ‘‘‘සුදුද්දසං සුනිපුණං, ගම්භීරං සුප්පකාසිතං;

ඤාණෙන කිත්තයිස්සාමි, සුණාථ මම භාසතො.

368. ‘‘‘චතුද්දසානි කප්පානි, දෙවරජ්ජං කරිස්සති;

කූටාගාරං මහන්තස්ස [බ්‍රහං තස්ස (සී. ස්‍යා.)], පද්මපුප්ඵෙහි ඡාදිතං.

369. ‘‘‘ආකාසෙ ධාරයිස්සති, පුප්ඵකම්මස්සිදං [පුබ්බකම්මස්සිදං (ස්‍යා.)] ඵලං;

චතුබ්බීසෙ [චතුද්දසෙ (ස්‍යා.)] කප්පසතෙ, වොකිණ්ණං සංසරිස්සති.

370. ‘‘‘තත්ථ පුප්ඵමයං බ්‍යම්හං, ආකාසෙ ධාරයිස්සති;

යථා පදුමපත්තම්හි, තොයං න උපලිම්පති.

371. ‘‘‘තථෙවීමස්ස ඤාණම්හි, කිලෙසා නොපලිම්පරෙ;

මනසා විනිවට්ටෙත්වා, පඤ්ච නීවරණෙ අයං.

372. ‘‘‘චිත්තං ජනෙත්වා නෙක්ඛම්මෙ, අගාරා පබ්බජිස්සති;

තතො පුප්ඵමයෙ බ්‍යම්හෙ, ධාරෙන්තෙ [පුප්ඵමයං බ්‍යම්හං, ධාරෙන්තං (ස්‍යා. ක.)] නික්ඛමිස්සති.

373. ‘‘‘රුක්ඛමූලෙ වසන්තස්ස, නිපකස්ස සතීමතො;

තත්ථ පුප්ඵමයං බ්‍යම්හං, මත්ථකෙ ධාරයිස්සති.

374. ‘‘‘චීවරං පිණ්ඩපාතඤ්ච, පච්චයං සයනාසනං;

දත්වාන භික්ඛුසඞ්ඝස්ස, නිබ්බායිස්සතිනාසවො’.

375. ‘‘කූටාගාරෙන චරතා [චරණා (සී. පී. ක.), චරිතෙ (ස්‍යා.)], පබ්බජ්ජං අභිනික්ඛමිං;

රුක්ඛමූලෙ වසන්තම්පි [වසන්තම්හි (සී.), වසතොපි (?)], කූටාගාරං ධරීයති.

376. ‘‘චීවරෙ පිණ්ඩපාතෙ ච, චෙතනා මෙ න විජ්ජති;

පුඤ්ඤකම්මෙන සංයුත්තො, ලභාමි පරිනිට්ඨිතං.

377. ‘‘ගණනාතො අසඞ්ඛෙය්‍යා, කප්පකොටී බහූ මම;

රිත්තකා තෙ අතික්කන්තා, පමුත්තා ලොකනායකා.

378. ‘‘අට්ඨාරසෙ කප්පසතෙ, පියදස්සී විනායකො;

තමහං පයිරුපාසිත්වා, ඉමං යොනිං උපාගතො.

379. ‘‘ඉධ පස්සාමි [ඉධද්දසාසිං (සී.)] සම්බුද්ධං, අනොමං නාම චක්ඛුමං;

තමහං උපගන්ත්වාන, පබ්බජිං අනගාරියං.

380. ‘‘දුක්ඛස්සන්තකරො බුද්ධො, මග්ගං මෙ දෙසයී ජිනො;

තස්ස ධම්මං සුණිත්වාන, පත්තොම්හි අචලං පදං.

381. ‘‘තොසයිත්වාන සම්බුද්ධං, ගොතමං සක්‍යපුඞ්ගවං;

සබ්බාසවෙ පරිඤ්ඤාය, විහරාමි අනාසවො.

382. ‘‘අට්ඨාරසෙ කප්පසතෙ, යං බුද්ධමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

383. ‘‘කිලෙසා ඣාපිතා මය්හං, භවා සබ්බෙ සමූහතා;

සබ්බාසවා පරික්ඛීණා, නත්ථි දානි පුනබ්භවො.

384. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

385. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පදුමකූටාගාරියො ථෙරො ඉමා ගාථායො අභාසිත්ථාති.

පදුමකූටාගාරියත්ථෙරස්සාපදානං පඤ්චමං.