10. පුබ්බකම්මපිලොතිකබුද්ධඅපදානං

64. ‘‘අනොතත්තසරාසන්නෙ, රමණීයෙ සිලාතලෙ;

නානාරතනපජ්ජොතෙ, නානාගන්ධවනන්තරෙ.

65. ‘‘මහතා භික්ඛුසඞ්ඝෙන, පරෙතො [උපෙතො (උදානට්ඨකථායං 4 වග්ගෙ, 8 සුත්තෙ)] ලොකනායකො;

ආසීනො බ්‍යාකරී තත්ථ, පුබ්බකම්මානි අත්තනො.

66. [සුණාථ භික්ඛවෙ මය්හං, යං කම්මං පකතං මයා; එකං අරඤ්ඤිකං භික්ඛුං, දිස්වා දින්නං පිලොතිකං; පත්ථිතං පඨමං බුද්ධං, බුද්ධත්තාය මයා තදා; පිලොතියස්ස කම්මස්ස, බුද්ධත්තෙපි විපච්චති; ගොපාලකො පුරෙ ආසිං, ගාවිං පාජෙති ගොචරං; පිවන්තිං උදකං ආවිලං, ගාවිං දිස්වා නිවාරයිං; තෙන කම්මවිපාකෙන, ඉධ පච්ඡිමකෙ භවෙ; විපාසිතො යදිච්ඡකං, න හි පාතුං ලභාමහං (ස්‍යා.)] ‘‘සුණාථ භික්ඛවො මය්හං, යං කම්මං පකතං මයා;

පිලොතිකස්ස කම්මස්ස, බුද්ධත්තෙපි විපච්චති [සුණාථ භික්ඛවෙ මය්හං, යං කම්මං පකතං මයා; එකං අරඤ්ඤිකං භික්ඛුං, දිස්වා දින්නං පිලොතිකං; පත්ථිතං පඨමං බුද්ධං, බුද්ධත්තාය මයා තදා; පිලොතියස්ස කම්මස්ස, බුද්ධත්තෙපි විපච්චති; ගොපාලකො පුරෙ ආසිං, ගාවිං පාජෙති ගොචරං; පිවන්තිං උදකං ආවිලං, ගාවිං දිස්වා නිවාරයිං; තෙන කම්මවිපාකෙන, ඉධ පච්ඡිමකෙ භවෙ; විපාසිතො යදිච්ඡකං, න හි පාතුං ලභාමහං (ස්‍යා.)].

[1]

67. ‘‘මුනාළි නාමහං ධුත්තො, පුබ්බෙ අඤ්ඤාසු ජාතිසු [අඤ්ඤාය ජාතියා (උදාන අට්ඨ.)];

පච්චෙකබුද්ධං සුරභිං [සරභුං (සී.)], අබ්භාචික්ඛිං අදූසකං.

68. ‘‘තෙන කම්මවිපාකෙන, නිරයෙ සංසරිං චිරං;

බහූවස්සසහස්සානි, දුක්ඛං වෙදෙසි වෙදනං.

69. ‘‘තෙන කම්මාවසෙසෙන, ඉධ පච්ඡිමකෙ භවෙ;

අබ්භක්ඛානං මයා ලද්ධං, සුන්දරිකාය කාරණා.

[2]

70. ‘‘සබ්බාභිභුස්ස බුද්ධස්ස, නන්දො නාමාසි සාවකො;

තං අබ්භක්ඛාය නිරයෙ, චිරං සංසරිතං මයා.

71. ‘‘දසවස්සසහස්සානි, නිරයෙ සංසරිං චිරං;

මනුස්සභාවං ලද්ධාහං, අබ්භක්ඛානං බහුං ලභිං.

72. ‘‘තෙන කම්මාවසෙසෙන, චිඤ්චමානවිකා මමං;

අබ්භාචික්ඛි අභූතෙන, ජනකායස්ස අග්ගතො.

[3]

73. ‘‘බ්‍රාහ්මණො සුතවා ආසිං, අහං සක්කතපූජිතො;

මහාවනෙ පඤ්චසතෙ, මන්තෙ වාචෙමි මාණවෙ.

74. ‘‘තත්ථාගතො [තමාගතො (ක.)] ඉසි භීමො, පඤ්චාභිඤ්ඤො මහිද්ධිකො;

තං චාහං ආගතං දිස්වා, අබ්භාචික්ඛිං අදූසකං.

75. ‘‘තතොහං අවචං සිස්සෙ, කාමභොගී අයං ඉසි;

මය්හම්පි භාසමානස්ස, අනුමොදිංසු මාණවා.

76. ‘‘තතො මාණවකා සබ්බෙ, භික්ඛමානං කුලෙ කුලෙ;

මහාජනස්ස ආහංසු, කාමභොගී අයං ඉසි.

77. ‘‘තෙන කම්මවිපාකෙන, පඤ්ච භික්ඛුසතා ඉමෙ;

අබ්භක්ඛානං ලභුං සබ්බෙ, සුන්දරිකාය කාරණා.

[4]

78. ‘‘වෙමාතුභාතරං පුබ්බෙ, ධනහෙතු හනිං අහං;

පක්ඛිපිං ගිරිදුග්ගස්මිං, සිලාය ච අපිංසයිං.

79. ‘‘තෙන කම්මවිපාකෙන, දෙවදත්තො සිලං ඛිපි;

අඞ්ගුට්ඨං පිංසයී පාදෙ, මම පාසාණසක්ඛරා.

[5]

80. ‘‘පුරෙහං දාරකො හුත්වා, කීළමානො මහාපථෙ;

පච්චෙකබුද්ධං දිස්වාන, මග්ගෙ සකලිකං [සක්ඛලිකං (ක.)] ඛිපිං [දහිං (ස්‍යා.)].

81. ‘‘තෙන කම්මවිපාකෙන, ඉධ පච්ඡිමකෙ භවෙ;

වධත්ථං මං දෙවදත්තො, අභිමාරෙ පයොජයි.

[6]

82. ‘‘හත්ථාරොහො පුරෙ ආසිං, පච්චෙකමුනිමුත්තමං;

පිණ්ඩාය විචරන්තං තං, ආසාදෙසිං ගජෙනහං.

83. ‘‘තෙන කම්මවිපාකෙන, භන්තො [දන්තො (ක.)] නාළාගිරී ගජො;

ගිරිබ්බජෙ පුරවරෙ, දාරුණො සමුපාගමි [මං උපාගමි (සී.)].

[7]

84. ‘‘රාජාහං පත්ථිවො [පත්තිකො (ස්‍යා. ක.), ඛත්තියො (උදාන අට්ඨ.)] ආසිං, සත්තියා පුරිසං හනිං;

තෙන කම්මවිපාකෙන, නිරයෙ පච්චිසං භුසං.

85. ‘‘කම්මුනො තස්ස සෙසෙන, ඉදානි සකලං මම;

පාදෙ ඡවිං පකප්පෙසි [පකොපෙසි (සී.)], න හි කම්මං විනස්සති.

[8]

86. ‘‘අහං කෙවට්ටගාමස්මිං, අහුං කෙවට්ටදාරකො;

මච්ඡකෙ ඝාතිතෙ දිස්වා, ජනයිං සොමනස්සකං [සොමනස්සහං (උදාන අට්ඨ.)].

87. ‘‘තෙන කම්මවිපාකෙන, සීසදුක්ඛං අහූ මම;

සබ්බෙ සක්කා ච හඤ්ඤිංසු, යදා හනි විටටූභො [විටටුභො (ස්‍යා. ක.)].

[9]

88. ‘‘ඵුස්සස්සාහං පාවචනෙ, සාවකෙ පරිභාසයිං;

යවං ඛාදථ භුඤ්ජථ, මා ච භුඤ්ජථ සාලයො.

89. ‘‘තෙන කම්මවිපාකෙන, තෙමාසං ඛාදිතං යවං;

නිමන්තිතො බ්‍රාහ්මණෙන, වෙරඤ්ජායං වසිං තදා.

[10]

90. ‘‘නිබ්බුද්ධෙ වත්තමානම්හි, මල්ලපුත්තං නිහෙඨයිං [නිසෙධයිං (ස්‍යා. ක.)];

තෙන කම්මවිපාකෙන, පිට්ඨිදුක්ඛං අහූ මම.

[11]

91. ‘‘තිකිච්ඡකො අහං ආසිං, සෙට්ඨිපුත්තං විරෙචයිං;

තෙන කම්මවිපාකෙන, හොති පක්ඛන්දිකා මම.

[12]

92. ‘‘අවචාහං ජොතිපාලො, සුගතං කස්සපං තදා;

කුතො නු බොධි මුණ්ඩස්ස, බොධි පරමදුල්ලභා.

93. ‘‘තෙන කම්මවිපාකෙන, අචරිං දුක්කරං බහුං;

ඡබ්බස්සානුරුවෙළායං, තතො බොධිමපාපුණිං.

94. ‘‘නාහං එතෙන මග්ගෙන, පාපුණිං බොධිමුත්තමං;

කුම්මග්ගෙන ගවෙසිස්සං, පුබ්බකම්මෙන වාරිතො.

95. ‘‘පුඤ්ඤපාපපරික්ඛීණො, සබ්බසන්තාපවජ්ජිතො;

අසොකො අනුපායාසො, නිබ්බායිස්සමනාසවො.

96. ‘‘එවං ජිනො වියාකාසි, භික්ඛුසඞ්ඝස්ස අග්ගතො;

සබ්බාභිඤ්ඤාබලප්පත්තො, අනොතත්තෙ මහාසරෙ’’ති.

ඉත්ථං සුදං භගවා අත්තනො පුබ්බචරිතං කම්මපිලොතිකං නාම බුද්ධාපදානධම්මපරියායං අභාසිත්ථාති.

පුබ්බකම්මපිලොතිකං නාම බුද්ධාපදානං දසමං.

අවටඵලවග්ගො එකූනචත්තාලීසමො.