1. අවටඵලදායකත්ථෙරඅපදානං

1. ‘‘සතරංසි නාම භගවා, සයම්භූ අපරාජිතො;

විවෙකකාමො සම්බුද්ධො, ගොචරායාභිනික්ඛමි.

2. ‘‘ඵලහත්ථො අහං දිස්වා, උපගච්ඡිං නරාසභං;

පසන්නචිත්තො සුමනො, අවටං [අවණ්ටං (සී.), අම්බටං (ස්‍යා.)] අදදිං ඵලං.

3. ‘‘චතුන්නවුතිතො කප්පෙ, යං ඵලමදදිං අහං;

දුග්ගතිං නාභිජානාමි, ඵලදානස්සිදං ඵලං.

4. ‘‘කිලෙසා ඣාපිතා මය්හං, භවා සබ්බෙ සමූහතා;

නාගොව බන්ධනං ඡෙත්වා, විහරාමි අනාසවො.

5. ‘‘ස්වාගතං වත මෙ ආසි, මම බුද්ධස්ස සන්තිකෙ;

තිස්සො විජ්ජා අනුප්පත්තා, කතං බුද්ධස්ස සාසනං.

6. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා අවටඵලදායකො ථෙරො ඉමා ගාථායො අභාසිත්ථාති.

අවටඵලදායකත්ථෙරස්සාපදානං පඨමං.