2. ලබුජදායකත්ථෙරඅපදානං

7. ‘‘නගරෙ බන්ධුමතියා, ආසිං ආරාමිකො තදා;

අද්දසං විරජං බුද්ධං, ගච්ඡන්තං අනිලඤ්ජසෙ.

8. ‘‘ලබුජස්ස ඵලං ගය්හ, බුද්ධසෙට්ඨස්සදාසහං;

ආකාසෙ ඨිතකො සන්තො, පටිගණ්හි මහායසො.

9. ‘‘විත්තිසඤ්ජනනං මය්හං, දිට්ඨධම්මසුඛාවහං;

ඵලං බුද්ධස්ස දත්වාන, විප්පසන්නෙන චෙතසා.

10. ‘‘අධිගච්ඡිං තදා පීතිං, විපුලඤ්ච සුඛුත්තමං;

උප්පජ්ජතෙව රතනං, නිබ්බත්තස්ස තහිං තහිං.

11. ‘‘එකනවුතිතො කප්පෙ, යං ඵලමදදිං තදා;

දුග්ගතිං නාභිජානාමි, ඵලදානස්සිදං ඵලං.

12. ‘‘කිලෙසා ඣාපිතා මය්හං…පෙ… විහරාමි අනාසවො.

13. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

14. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ලබුජදායකො ථෙරො ඉමා ගාථායො අභාසිත්ථාති.

ලබුජදායකත්ථෙරස්සාපදානං දුතියං.