2. පාටලිපුප්ඵියත්ථෙරඅපදානං

6. ‘‘විපස්සී නාම භගවා, සයම්භූ අග්ගපුග්ගලො;

පුරක්ඛතො සසිස්සෙහි, පාවිසි බන්ධුමං ජිනො.

7. ‘‘තීණි පාටලිපුප්ඵානි, උච්ඡඞ්ගෙ ඨපිතානි මෙ;

සීසං න්හායිතුකාමොව, නදීතිත්ථං අගච්ඡහං.

8. ‘‘නික්ඛම්ම බන්ධුමතියා, අද්දසං ලොකනායකං;

ඉන්දීවරංව ජලිතං, ආදිත්තංව හුතාසනං.

9. ‘‘බ්‍යග්ඝූසභංව පවරං, අභිජාතංව කෙසරිං;

ගච්ඡන්තං සමණානග්ගං, භික්ඛුසඞ්ඝපුරක්ඛතං.

10. ‘‘තස්මිං පසන්නො [සමණෙ (ක.)] සුගතෙ, කිලෙසමලධොවනෙ;

ගහෙත්වා තීණි පුප්ඵානි, බුද්ධසෙට්ඨං අපූජයිං.

11. ‘‘එකනවුතිතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

12. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පාටලිපුප්ඵියො ථෙරො ඉමා ගාථායො අභාසිත්ථාති.

පාටලිපුප්ඵියත්ථෙරස්සාපදානං දුතියං.