3. තීණුප්පලමාලියත්ථෙරඅපදානං

13. ‘‘චන්දභාගානදීතීරෙ, අහොසිං වානරො තදා;

අද්දසං විරජං බුද්ධං, නිසින්නං පබ්බතන්තරෙ.

14. ‘‘ඔභාසෙන්තං දිසා සබ්බා, සාලරාජංව ඵුල්ලිතං;

ලක්ඛණබ්‍යඤ්ජනූපෙතං, දිස්වානත්තමනො අහං.

15. ‘‘උදග්ගචිත්තො සුමනො, පීතියා හට්ඨමානසො;

තීණි උප්පලපුප්ඵානි, මත්ථකෙ අභිරොපයිං.

16. ‘‘පූජයිත්වාන පුප්ඵානි, ඵුස්සස්සාහං මහෙසිනො;

සගාරවො භවිත්වාන, පක්කාමිං උත්තරාමුඛො.

17. ‘‘ගච්ඡන්තො පටිකුටිකො, විප්පසන්නෙන චෙතසා;

සෙලන්තරෙ පතිත්වාන, පාපුණිං ජීවිතක්ඛයං.

18. ‘‘තෙන කම්මෙන සුකතෙන, චෙතනාපණිධීහි ච;

ජහිත්වා පුරිමං ජාතිං, තාවතිංසමගච්ඡහං.

19. ‘‘සතානං තීණික්ඛත්තුඤ්ච, දෙවරජ්ජමකාරයිං;

සතානං පඤ්චක්ඛත්තුඤ්ච, චක්කවත්තී අහොසහං.

20. ‘‘ද්වෙනවුතෙ ඉතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

21. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා තීණුප්පලමාලියො ථෙරො ඉමා ගාථායො අභාසිත්ථාති.

තීණුප්පලමාලියත්ථෙරස්සාපදානං තතියං.