1. බොධිවන්දකත්ථෙරඅපදානං

1. ‘‘පාටලිං හරිතං දිස්වා, පාදපං ධරණීරුහං;

එකංසං අඤ්ජලිං කත්වා, අවන්දිං පාටලිං අහං.

2. ‘‘අඤ්ජලිං පග්ගහෙත්වාන, ගරුං කත්වාන මානසං;

අන්තොසුද්ධං බහිසුද්ධං, සුවිමුත්තමනාසවං.

3. ‘‘විපස්සිං ලොකමහිතං, කරුණාඤාණසාගරං;

සම්මුඛා විය සම්බුද්ධං, අවන්දිං පාටලිං අහං.

4. ‘‘එකනවුතිතො කප්පෙ, යං බොධිමභිවන්දහං;

දුග්ගතිං නාභිජානාමි, වන්දනාය ඉදං ඵලං.

5. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා බොධිවන්දකො ථෙරො ඉමා ගාථායො අභාසිත්ථාති.

බොධිවන්දකත්ථෙරස්සාපදානං පඨමං.