9. තිමිරපුප්ඵියත්ථෙරඅපදානං

31. ‘‘චන්දභාගානදීතීරෙ, අනුසොතං වජාමහං;

අද්දසං විරජං බුද්ධං, සාලරාජංව ඵුල්ලිතං.

32. ‘‘පසන්නචිත්තො සුමනො, පච්චෙකමුනිමුත්තමං;

ගහෙත්වා තිමිරං පුප්ඵං, මත්ථකෙ ඔකිරිං අහං.

33. ‘‘එකනවුතිතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

34. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා තිමිරපුප්ඵියො ථෙරො ඉමා ගාථායො අභාසිත්ථාති.

තිමිරපුප්ඵියත්ථෙරස්සාපදානං නවමං.