10. සළලපුප්ඵියත්ථෙරඅපදානං

35. ‘‘චන්දභාගානදීතීරෙ, අහොසිං කින්නරො තදා;

තත්ථද්දසං දෙවදෙවං, චඞ්කමන්තං නරාසභං.

36. ‘‘ඔචිනිත්වාන සළලං, පුප්ඵං බුද්ධස්සදාසහං;

උපසිඞ්ඝි මහාවීරො, සළලං දෙවගන්ධිකං.

37. ‘‘පටිග්ගහෙත්වා සම්බුද්ධො, විපස්සී ලොකනායකො;

උපසිඞ්ඝි මහාවීරො, පෙක්ඛමානස්ස මෙ සතො.

38. ‘‘පසන්නචිත්තො සුමනො, වන්දිත්වා ද්විපදුත්තමං;

අඤ්ජලිං පග්ගහෙත්වාන, පුන පබ්බතමාරුහිං.

39. ‘‘එකනවුතිතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

40. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සළලපුප්ඵියො ථෙරො ඉමා ගාථායො අභාසිත්ථාති.

සළලපුප්ඵියත්ථෙරස්සාපදානං දසමං.

මන්දාරවපුප්ඵියවග්ගො සත්තතිංසතිමො.