3. භිසමුළාලදායකත්ථෙරඅපදානං

8. ‘‘ඵුස්සො නාමාසි සම්බුද්ධො, සබ්බධම්මාන පාරගූ;

විවෙකකාමො සබ්බඤ්ඤූ [සප්පඤ්ඤො (සී. ස්‍යා.)], ආගඤ්ඡි මම සන්තිකෙ.

9. ‘‘තස්මිං චිත්තං පසාදෙත්වා, මහාකාරුණිකෙ ජිනෙ;

භිසමුළාලං පග්ගය්හ, බුද්ධසෙට්ඨස්සදාසහං.

10. ‘‘ද්වෙනවුතෙ ඉතො කප්පෙ, යං භිසමදදිං තදා;

දුග්ගතිං නාභිජානාමි, භිසදානස්සිදං ඵලං.

11. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා භිසමුළාලදායකො ථෙරො ඉමා ගාථායො අභාසිත්ථාති.

භිසමුළාලදායකත්ථෙරස්සාපදානං තතියං.