6. අන්නසංසාවකත්ථෙරඅපදානං

34. ‘‘සුවණ්ණවණ්ණං සම්බුද්ධං, ගච්ඡන්තං අන්තරාපණෙ;

කඤ්චනග්ඝියසඞ්කාසං, බාත්තිංසවරලක්ඛණං.

35. ‘‘සිද්ධත්ථං සබ්බසිද්ධත්ථං, අනෙජං අපරාජිතං;

සම්බුද්ධං අතිනාමෙත්වා, භොජයිං තං මහාමුනිං.

36. ‘‘මුනි කාරුණිකො ලොකෙ, ඔභාසයි මමං තදා;

බුද්ධෙ චිත්තං පසාදෙත්වා, කප්පං සග්ගම්හි මොදහං.

37. ‘‘චතුන්නවුතිතො කප්පෙ, යං දානමදදිං තදා;

දුග්ගතිං නාභිජානාමි, භික්ඛාදානස්සිදං ඵලං.

38. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා අන්නසංසාවකො ථෙරො ඉමා ගාථායො අභාසිත්ථාති;

අන්නසංසාවකත්ථෙරස්සාපදානං ඡට්ඨං.