9. කන්දලිපුප්ඵියත්ථෙරඅපදානං

47. ‘‘සින්ධුයා නදියා තීරෙ, අහොසිං කස්සකො තදා;

පරකම්මායනෙ යුත්තො, පරභත්තං අපස්සිතො.

48. ‘‘සින්ධුං අනුචරන්තොහං, සිද්ධත්ථං ජිනමද්දසං;

සමාධිනා නිසින්නංව, සතපත්තංව පුප්ඵිතං.

49. ‘‘සත්ත කන්දලිපුප්ඵානි, වණ්ටෙ ඡෙත්වානහං තදා;

මත්ථකෙ අභිරොපෙසිං, බුද්ධස්සාදිච්චබන්ධුනො.

50. ‘‘සුවණ්ණවණ්ණං සම්බුද්ධං, අනුකූලෙ සමාහිතං;

තිධාපභින්නමාතඞ්ගං, කුඤ්ජරංව දුරාසදං.

51. ‘‘තමහං උපගන්ත්වාන, නිපකං භාවිතින්ද්‍රියං;

අඤ්ජලිං පග්ගහෙත්වාන, අවන්දිං සත්ථුනො අහං.

52. ‘‘චතුන්නවුතිතො කප්පෙ, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

53. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා කන්දලිපුප්ඵියො ථෙරො ඉමා ගාථායො අභාසිත්ථාති.

කන්දලිපුප්ඵියත්ථෙරස්සාපදානං නවමං.