32. ආරක්ඛදායකවග්ගො

1. ආරක්ඛදායකත්ථෙරඅපදානං

1. ‘‘ධම්මදස්සිස්ස මුනිනො, වති කාරාපිතා මයා;

ආරක්ඛො ච මයා දින්නො, ද්විපදින්දස්ස තාදිනො.

2. ‘‘අට්ඨාරසෙ කප්පසතෙ, යං කම්මමකරිං තදා;

තෙන කම්මවිසෙසෙන, පත්තො මෙ ආසවක්ඛයො.

3. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා ආරක්ඛදායකො ථෙරො ඉමා ගාථායො අභාසිත්ථාති.

ආරක්ඛදායකත්ථෙරස්සාපදානං පඨමං.

2. භොජනදායකත්ථෙරඅපදානං

4. ‘‘සුජාතො සාලලට්ඨීව, සොභඤ්ජනමිවුග්ගතො;

ඉන්දලට්ඨිරිවාකාසෙ, විරොචති සදා ජිනො.

5. ‘‘තස්ස දෙවාතිදෙවස්ස, වෙස්සභුස්ස මහෙසිනො;

අදාසි භොජනමහං, විප්පසන්නෙන චෙතසා.

6. ‘‘තං මෙ බුද්ධො අනුමොදි, සයම්භූ අපරාජිතො;

භවෙ නිබ්බත්තමානම්හි, ඵලං නිබ්බත්තතූ තව.

7. ‘‘එකත්තිංසෙ ඉතො කප්පෙ, යං දානමදදිං තදා;

දුග්ගතිං නාභිජානාමි, භොජනස්ස ඉදං ඵලං.

8. ‘‘පඤ්චවීසෙ ඉතො කප්පෙ, එකො ආසිං අමිත්තකො;

සත්තරතනසම්පන්නො, චක්කවත්තී මහබ්බලො.

9. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා භොජනදායකො ථෙරො ඉමා ගාථායො අභාසිත්ථාති.

භොජනදායකත්ථෙරස්සාපදානං දුතියං.

3. ගතසඤ්ඤකත්ථෙරඅපදානං

10. ‘‘ආකාසෙව පදං නත්ථි, අම්බරෙ අනිලඤ්ජසෙ;

සිද්ධත්ථං ජිනමද්දක්ඛිං, ගච්ඡන්තං තිදිවඞ්ගණෙ [තිදිවඞ්ගණං (ස්‍යා. ක.)].

11. ‘‘අනිලෙනෙරිතං දිස්වා, සම්මාසම්බුද්ධචීවරං;

විත්ති මමාහු තාවදෙ [විත්ති මෙ පාහුණා තාව (ස්‍යා.), විත්ති මෙ තාවදෙ ජාතා (සී.)], දිස්වාන ගමනං මුනිං [මුනෙ (සී.)].

12. ‘‘චතුන්නවුතිතො කප්පෙ, යං සඤ්ඤමලභිං තදා;

දුග්ගතිං නාභිජානාමි, බුද්ධසඤ්ඤායිදං ඵලං.

13. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ගතසඤ්ඤකො ථෙරො ඉමා ගාථායො අභාසිත්ථාති.

ගතසඤ්ඤකත්ථෙරස්සාපදානං තතියං.

4. සත්තපදුමියත්ථෙරඅපදානං

14. ‘‘නදීකූලෙ වසාමහං, නෙසාදො නාම බ්‍රාහ්මණො;

සතපත්තෙහි පුප්ඵෙහි, සම්මජ්ජිත්වාන අස්සමං.

15. ‘‘සුවණ්ණවණ්ණං සම්බුද්ධං, සිද්ධත්ථං ලොකනායකං;

දිස්වා නභෙන [වනෙන (ස්‍යා. ක.)] ගච්ඡන්තං, හාසො මෙ උදපජ්ජථ.

16. ‘‘පච්චුග්ගන්ත්වාන සම්බුද්ධං, ලොකජෙට්ඨං නරාසභං;

අස්සමං අතිනාමෙත්වා, ජලජග්ගෙහි ඔකිරිං.

17. ‘‘චතුන්නවුතිතො කප්පෙ, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

18. ‘‘ඉතො තෙ සත්තමෙ කප්පෙ, චතුරො පාදපාවරා;

සත්තරතනසම්පන්නා, චක්කවත්තී මහබ්බලා.

19. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සත්තපදුමියො ථෙරො ඉමා ගාථායො අභාසිත්ථාති.

සත්තපදුමියත්ථෙරස්සාපදානං චතුත්ථං.

5. පුප්ඵාසනදායකත්ථෙරඅපදානං

20. ‘‘සුවණ්ණවණ්ණං සම්බුද්ධං, පීතරංසිංව [සතරංසිංව (සී. ස්‍යා.)] භාණුමං;

අවිදූරෙන ගච්ඡන්තං, සිද්ධත්ථං අපරාජිතං.

21. ‘‘තස්ස පච්චුග්ගමිත්වාන, පවෙසෙත්වාන අස්සමං;

පුප්ඵාසනං මයා දින්නං, විප්පසන්නෙන චෙතසා.

22. ‘‘අඤ්ජලිං පග්ගහෙත්වාන, වෙදජාතො තදා අහං;

බුද්ධෙ චිත්තං පසාදෙත්වා, තං කම්මං පරිණාමයිං.

23. ‘‘යං මෙ අත්ථි කතං පුඤ්ඤං, සයම්භුම්හපරාජිතෙ;

සබ්බෙන තෙන කුසලෙන, විමලො හොමි සාසනෙ.

24. ‘‘චතුන්නවුතිතො කප්පෙ, පුප්ඵාසනමදං තදා;

දුග්ගතිං නාභිජානාමි, පුප්ඵාසනස්සිදං ඵලං.

25. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පුප්ඵාසනදායකො ථෙරො ඉමා ගාථායො අභාසිත්ථාති.

පුප්ඵාසනදායකත්ථෙරස්සාපදානං පඤ්චමං.

6. ආසනසන්ථවිකත්ථෙරඅපදානං

26. ‘‘චෙතියං උත්තමං නාම, සිඛිනො ලොකබන්ධුනො;

අරඤ්ඤෙ ඉරීණෙ වනෙ, අන්ධාහිණ්ඩාමහං තදා.

27. ‘‘පවනා නික්ඛමන්තෙන, දිට්ඨං සීහාසනං මයා;

එකංසං අඤ්ජලිං කත්වා, සන්ථවිං [ථවිස්සං (සී.)] ලොකනායකං.

28. ‘‘දිවසභාගං ථවිත්වාන, බුද්ධං ලොකග්ගනායකං;

හට්ඨො හට්ඨෙන චිත්තෙන, ඉමං වාචං උදීරයිං.

29. ‘‘‘නමො තෙ පුරිසාජඤ්ඤ, නමො තෙ පුරිසුත්තම;

සබ්බඤ්ඤූසි මහාවීර, ලොකජෙට්ඨ නරාසභ’.

30. ‘‘අභිත්ථවිත්වා සිඛිනං, නිමිත්තකරණෙනහං;

ආසනං අභිවාදෙත්වා, පක්කාමිං උත්තරාමුඛො.

31. ‘‘එකත්තිංසෙ ඉතො කප්පෙ, යං ථවිං වදතං වරං;

දුග්ගතිං නාභිජානාමි, ථොමනාය ඉදං ඵලං.

32. ‘‘සත්තවීසෙ ඉතො කප්පෙ, අතුලා සත්ත ආසු තෙ;

සත්තරතනසම්පන්නා, චක්කවත්තී මහබ්බලා.

33. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ආසනසන්ථවිකො [ආසනසන්ථවකො (?), ආසනථවිකො (ක.), ආසනත්ථවිකො (සී. ස්‍යා.)] ථෙරො ඉමා ගාථායො අභාසිත්ථාති.

ආසනසන්ථවිකත්ථෙරස්සාපදානං ඡට්ඨං.

7. සද්දසඤ්ඤකත්ථෙරඅපදානං

34. ‘‘සුදස්සනො මහාවීරො, දෙසෙති අමතං පදං;

පරිවුතො සාවකෙහි, වසති ඝරමුත්තමෙ.

35. ‘‘තාය වාචාය මධුරාය, සඞ්ගණ්හාති [සඞ්ගණ්හන්තෙ (සී.)] මහාජනං;

ඝොසො ච විපුලො ආසි, ආසීසො [ආසංසො (සී.)] දෙවමානුසෙ.

36. ‘‘නිග්ඝොසසද්දං සුත්වාන, සිද්ධත්ථස්ස මහෙසිනො;

සද්දෙ චිත්තං පසාදෙත්වා, අවන්දිං ලොකනායකං.

37. ‘‘චතුන්නවුතිතො කප්පෙ, යං සඤ්ඤමලභිං තදා;

දුග්ගතිං නාභිජානාමි, බුද්ධසඤ්ඤායිදං ඵලං.

38. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සද්දසඤ්ඤකො ථෙරො ඉමා ගාථායො අභාසිත්ථාති.

සද්දසඤ්ඤකත්ථෙරස්සාපදානං සත්තමං.

8. තිරංසියත්ථෙරඅපදානං

39. ‘‘කෙසරිං අභිජාතංව, අග්ගික්ඛන්ධංව පබ්බතෙ;

ඔභාසෙන්තං දිසා සබ්බා [නිවාසෙන්තං (ක.), දිසාසින්නං (ස්‍යා.)], සිද්ධත්ථං පබ්බතන්තරෙ.

40. ‘‘සූරියස්ස ච ආලොකං, චන්දාලොකං තථෙව ච;

බුද්ධාලොකඤ්ච දිස්වාන, විත්ති මෙ උදපජ්ජථ.

41. ‘‘තයො ආලොකෙ දිස්වාන, සම්බුද්ධං [බුද්ධඤ්ච (සී.)] සාවකුත්තමං;

එකංසං අජිනං කත්වා, සන්ථවිං ලොකනායකං.

42. ‘‘තයො හි ආලොකකරා, ලොකෙ ලොකතමොනුදා;

චන්දො ච සූරියො චාපි, බුද්ධො ච ලොකනායකො.

43. ‘‘ඔපම්මං උපදස්සෙත්වා, කිත්තිතො මෙ මහාමුනි;

බුද්ධස්ස වණ්ණං කිත්තෙත්වා, කප්පං සග්ගම්හි මොදහං.

44. ‘‘චතුන්නවුතිතො කප්පෙ, යං බුද්ධමභිකිත්තයිං;

දුග්ගතිං නාභිජානාමි, කිත්තනාය ඉදං ඵලං.

45. ‘‘එකසට්ඨිම්හිතො කප්පෙ, එකො ඤාණධරො අහු;

සත්තරතනසම්පන්නො, චක්කවත්තී මහබ්බලො.

46. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා තිරංසියො ථෙරො ඉමා ගාථායො අභාසිත්ථාති.

තිරංසියත්ථෙරස්සාපදානං අට්ඨමං.

9. කන්දලිපුප්ඵියත්ථෙරඅපදානං

47. ‘‘සින්ධුයා නදියා තීරෙ, අහොසිං කස්සකො තදා;

පරකම්මායනෙ යුත්තො, පරභත්තං අපස්සිතො.

48. ‘‘සින්ධුං අනුචරන්තොහං, සිද්ධත්ථං ජිනමද්දසං;

සමාධිනා නිසින්නංව, සතපත්තංව පුප්ඵිතං.

49. ‘‘සත්ත කන්දලිපුප්ඵානි, වණ්ටෙ ඡෙත්වානහං තදා;

මත්ථකෙ අභිරොපෙසිං, බුද්ධස්සාදිච්චබන්ධුනො.

50. ‘‘සුවණ්ණවණ්ණං සම්බුද්ධං, අනුකූලෙ සමාහිතං;

තිධාපභින්නමාතඞ්ගං, කුඤ්ජරංව දුරාසදං.

51. ‘‘තමහං උපගන්ත්වාන, නිපකං භාවිතින්ද්‍රියං;

අඤ්ජලිං පග්ගහෙත්වාන, අවන්දිං සත්ථුනො අහං.

52. ‘‘චතුන්නවුතිතො කප්පෙ, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

53. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා කන්දලිපුප්ඵියො ථෙරො ඉමා ගාථායො අභාසිත්ථාති.

කන්දලිපුප්ඵියත්ථෙරස්සාපදානං නවමං.

10. කුමුදමාලියත්ථෙරඅපදානං

54. ‘‘උසභං පවරං වීරං, මහෙසිං විජිතාවිනං;

විපස්සිනං මහාවීරං, අභිජාතංව කෙසරිං.

55. ‘‘රථියං පටිපජ්ජන්තං, ආහුතීනං පටිග්ගහං;

ගහෙත්වා කුමුදං මාලං, බුද්ධසෙට්ඨං සමොකිරිං.

56. ‘‘එකනවුතිතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

57. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා කුමුදමාලියො ථෙරො ඉමා ගාථායො අභාසිත්ථාති.

කුමුදමාලියත්ථෙරස්සාපදානං දසමං.

ආරක්ඛදායකවග්ගො බාත්තිංසතිමො [බත්තිංසතිමො (සී. ස්‍යා.)].