7. ආරාමදායකත්ථෙරඅපදානං

32. ‘‘සිද්ධත්ථස්ස භගවතො, ආරාමො රොපිතො මයා;

සන්දච්ඡායෙසු [සීතඡායෙසු (ස්‍යා.), සන්තච්ඡායෙසු (ක.)] රුක්ඛෙසු, උපාසන්තෙසු පක්ඛිසු.

33. ‘‘අද්දසං විරජං බුද්ධං, ආහුතීනං පටිග්ගහං;

ආරාමං අභිනාමෙසිං, ලොකජෙට්ඨං නරාසභං.

34. ‘‘හට්ඨො හට්ඨෙන චිත්තෙන, ඵලං පුප්ඵමදාසහං;

තතො ජාතප්පසාදොව, තං වනං පරිණාමයිං.

35. ‘‘බුද්ධස්ස යමිදං දාසිං, විප්පසන්නෙන චෙතසා;

භවෙ නිබ්බත්තමානම්හි, නිබ්බත්තති ඵලං මම.

36. ‘‘චතුන්නවුතිතො කප්පෙ, යං ආරාමමදං තදා;

දුග්ගතිං නාභිජානාමි, ආරාමස්ස ඉදං ඵලං.

37. ‘‘සත්තතිංසෙ ඉතො කප්පෙ, සත්තාසුං මුදුසීතලා;

සත්තරතනසම්පන්නා, චක්කවත්තී මහබ්බලා.

38. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ආරාමදායකො ථෙරො ඉමා ගාථායො අභාසිත්ථාති.

ආරාමදායකත්ථෙරස්සාපදානං සත්තමං.