7. දෙසකිත්තකත්ථෙරඅපදානං

31. ‘‘උපසාලකනාමොහං, අහොසිං බ්‍රාහ්මණො තදා;

කානනං වනමොගාළ්හං, ලොකජෙට්ඨං නරාසභං.

32. ‘‘දිස්වාන වන්දිං පාදෙසු, ලොකාහුතිපටිග්ගහං;

පසන්නචිත්තං මං ඤත්වා, බුද්ධො අන්තරධායථ.

33. ‘‘කානනා අභිනික්ඛම්ම, බුද්ධසෙට්ඨමනුස්සරිං;

තං දෙසං කිත්තයිත්වාන, කප්පං සග්ගම්හි මොදහං.

34. ‘‘ද්වෙනවුතෙ ඉතො කප්පෙ, යං දෙසමභිකිත්තයිං;

දුග්ගතිං නාභිජානාමි, කිත්තනාය ඉදං ඵලං.

35. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා දෙසකිත්තකො ථෙරො ඉමා ගාථායො අභාසිත්ථාති.

දෙසකිත්තකත්ථෙරස්සාපදානං සත්තමං.