9. එකඤ්ජලිකත්ථෙරඅපදානං

180. ‘‘සුවණ්ණවණ්ණං සම්බුද්ධං, ගච්ඡන්තං අන්තරාපණෙ;

විපස්සිං සත්ථවාහග්ගං, නරවරං විනායකං.

181. ‘‘අදන්තදමනං තාදිං, මහාවාදිං මහාමතිං;

දිස්වා පසන්නො සුමනො, එකඤ්ජලිමකාසහං.

182. ‘‘එකනවුතිතො කප්පෙ, යමඤ්ජලිං කරිං [යං අඤ්ජලිමකරිං (ස්‍යා.), අඤ්ජලිමකරිං (ක.)] තදා;

දුග්ගතිං නාභිජානාමි, අඤ්ජලිස්ස ඉදං ඵලං.

183. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා එකඤ්ජලිකො ථෙරො ඉමා ගාථායො අභාසිත්ථාති.

එකඤ්ජලිකත්ථෙරස්සාපදානං නවමං.