3. පච්චුග්ගමනියත්ථෙරඅපදානං

11. ‘‘සීහං යථා වනචරං, නිසභාජානියං යථා;

කකුධං විලසන්තංව, ආගච්ඡන්තං නරාසභං.

12. ‘‘සිද්ධත්ථං ලොකපජ්ජොතං, සබ්බලොකතිකිච්ඡකං;

අකාසිං පච්චුග්ගමනං, විප්පසන්නෙන චෙතසා.

13. ‘‘චතුන්නවුතිතො කප්පෙ, පච්චුග්ගච්ඡිං නරාසභං;

දුග්ගතිං නාභිජානාමි, පච්චුග්ගමනෙ ඉදං ඵලං.

14. ‘‘සත්තතිංසෙ [සත්තවීසෙ (සී. ස්‍යා.)] ඉතො කප්පෙ, එකො ආසිං ජනාධිපො;

සපරිවාරොති නාමෙන, චක්කවත්තී මහබ්බලො.

15. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පච්චුග්ගමනියො ථෙරො ඉමා ගාථායො අභාසිත්ථාති.

පච්චුග්ගමනියත්ථෙරස්සාපදානං තතියං.