1. පණ්ණදායකත්ථෙරඅපදානං

1. ‘‘පණ්ණසාලෙ නිසින්නොම්හි, පණ්ණභොජනභොජනො;

උපවිට්ඨඤ්ච මං සන්තං, උපාගච්ඡි මහාඉසි [මහාමුනි (සී.)].

2. ‘‘සිද්ධත්ථො ලොකපජ්ජොතො, සබ්බලොකතිකිච්ඡකො;

තස්ස පණ්ණං මයා දින්නං, නිසින්නං [නිසින්නස්ස (ස්‍යා. අට්ඨ.)] පණ්ණසන්ථරෙ.

3. ‘‘චතුන්නවුතිතො කප්පෙ, යං පණ්ණමදදිං තදා;

දුග්ගතිං නාභිජානාමි, පණ්ණදානස්සිදං ඵලං.

4. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා පණ්ණදායකො ථෙරො ඉමා ගාථායො අභාසිත්ථාති.

පණ්ණදායකත්ථෙරස්සාපදානං පඨමං.