4. අබ්භඤ්ජනදායකත්ථෙරඅපදානං

14. ‘‘කොණ්ඩඤ්ඤස්ස භගවතො, වීතරාගස්ස තාදිනො;

ආකාසසමචිත්තස්ස [අකක්කසචිත්තස්සාථ (අට්ඨ.)], නිප්පපඤ්චස්ස ඣායිනො.

15. ‘‘සබ්බමොහාතිවත්තස්ස, සබ්බලොකහිතෙසිනො;

අබ්භඤ්ජනං මයා දින්නං, ද්විපදින්දස්ස තාදිනො.

16. ‘‘අපරිමෙය්‍යෙ ඉතො කප්පෙ, අබ්භඤ්ජනමදං තදා [අම්භඤ්ජනමදාසහං (ස්‍යා.)];

දුග්ගතිං නාභිජානාමි, අබ්භඤ්ජනස්සිදං ඵලං.

17. ‘‘ඉතො පන්නරසෙ කප්පෙ, චිරප්පො නාම ඛත්තියො;

සත්තරතනසම්පන්නො, චක්කවත්තී මහබ්බලො.

18. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා අබ්භඤ්ජනදායකො ථෙරො ඉමා ගාථායො අභාසිත්ථාති.

අබ්භඤ්ජනදායකත්ථෙරස්සාපදානං චතුත්ථං.