3. සාලපුප්ඵියත්ථෙරඅපදානං

9. ‘‘අරුණවතියා නගරෙ, අහොසිං පූපිකො තදා;

මම ද්වාරෙන ගච්ඡන්තං, සිඛිනං අද්දසං ජිනං.

10. ‘‘බුද්ධස්ස පත්තං පග්ගය්හ, සාලපුප්ඵං අදාසහං;

සම්මග්ගතස්ස බුද්ධස්ස, විප්පසන්නෙන චෙතසා.

11. ‘‘එකත්තිංසෙ ඉතො කප්පෙ, යං පුප්ඵමභිදාසහං [යං ඛජ්ජකමදාසහං (සී.), යං ඛජ්ජමභිදාසහං (ක.) සාලපුප්ඵනාමකං ඛජ්ජකං වා භවෙය්‍ය];

දුග්ගතිං නාභිජානාමි, සාලපුප්ඵස්සිදං ඵලං.

12. ‘‘ඉතො චුද්දසකප්පම්හි, අහොසිං අමිතඤ්ජලො;

සත්තරතනසම්පන්නො, චක්කවත්තී මහබ්බලො.

13. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සාලපුප්ඵියො ථෙරො ඉමා ගාථායො අභාසිත්ථාති.

සාලපුප්ඵියත්ථෙරස්සාපදානං තතියං.