4. කිලඤ්ජදායකත්ථෙරඅපදානං

14. ‘‘තිවරායං පුරෙ රම්මෙ, නළකාරො අහං තදා;

සිද්ධත්ථෙ ලොකපජ්ජොතෙ, පසන්නා ජනතා තහිං.

15. ‘‘පූජත්ථං ලොකනාථස්ස, කිලඤ්ජං පරියෙසති;

බුද්ධපූජං කරොන්තානං, කිලඤ්ජං අදදිං අහං.

16. ‘‘චතුන්නවුතිතො කප්පෙ, යං කම්මමකරිං තදා;

දුග්ගතිං නාභිජානාමි, කිලඤ්ජස්ස ඉදං ඵලං.

17. ‘‘සත්තසත්තතිකප්පම්හි, රාජා ආසිං ජලද්ධරො [ජුතින්ධරො (සී.)];

සත්තරතනසම්පන්නො, චක්කවත්තී මහබ්බලො.

18. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා කිලඤ්ජදායකො ථෙරො ඉමා ගාථායො අභාසිත්ථාති.

කිලඤ්ජදායකත්ථෙරස්සාපදානං චතුත්ථං.