1. උදකාසනදායකත්ථෙරඅපදානං

1. ‘‘ආරාමද්වාරා නික්ඛම්ම, ඵලකං සන්ථරිං අහං;

උදකඤ්ච උපට්ඨාසිං, උත්තමත්ථස්ස පත්තියා.

2. ‘‘එකත්තිංසෙ ඉතො කප්පෙ, යං කම්මමකරිං තදා;

දුග්ගතිං නාභිජානාමි, ආසනෙ චොදකෙ ඵලං.

3. ‘‘ඉතො පන්නරසෙ කප්පෙ, අභිසාමසමව්හයො;

සත්තරතනසම්පන්නො, චක්කවත්තී මහබ්බලො.

4. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා උදකාසනදායකො ථෙරො ඉමා ගාථායො අභාසිත්ථාති.

උදකාසනදායකත්ථෙරස්සාපදානං පඨමං.