7. තාලවණ්ටදායකත්ථෙරඅපදානං

31. ‘‘තාලවණ්ටං මයා දින්නං, තිස්සස්සාදිච්චබන්ධුනො;

ගිම්හනිබ්බාපනත්ථාය, පරිළාහොපසන්තියා.

32. ‘‘සන්නිබ්බාපෙමි රාගග්ගිං, දොසග්ගිඤ්ච තදුත්තරිං;

නිබ්බාපෙමි ච මොහග්ගිං, තාලවණ්ටස්සිදං ඵලං.

33. ‘‘කිලෙසා ඣාපිතා මය්හං, භවා සබ්බෙ සමූහතා;

ධාරෙමි අන්තිමං දෙහං, සම්මාසම්බුද්ධසාසනෙ.

34. ‘‘ද්වෙනවුතෙ ඉතො කප්පෙ, යං කම්මමකරිං තදා;

දුග්ගතිං නාභිජානාමි, තාලවණ්ටස්සිදං ඵලං.

35. ‘‘තෙසට්ඨිම්හි ඉතො කප්පෙ, මහානාමසනාමකො;

සත්තරතනසම්පන්නො, චක්කවත්තී මහබ්බලො.

36. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා තාලවණ්ටදායකො ථෙරො ඉමා ගාථායො අභාසිත්ථාති.

තාලවණ්ටදායකත්ථෙරස්සාපදානං සත්තමං.