6. උදකදායකත්ථෙරඅපදානං

25. ‘‘භුඤ්ජන්තං සමණං දිස්වා, විප්පසන්නමනාවිලං;

ඝටෙනොදකමාදාය, සිද්ධත්ථස්ස අදාසහං.

26. ‘‘නිම්මලො හොමහං අජ්ජ, විමලො ඛීණසංසයො;

භවෙ නිබ්බත්තමානම්හි, ඵලං නිබ්බත්තතෙ මම [සුභං (සී.)].

27. ‘‘චතුන්නවුතිතො කප්පෙ, උදකං යමදාසහං [යං තදා අදං (සී.), අදදිං තදා (ස්‍යා.)];

දුග්ගතිං නාභිජානාමි, දකදානස්සිදං ඵලං.

28. ‘‘එකසට්ඨිම්හිතො කප්පෙ, එකොව විමලො අහු;

සත්තරතනසම්පන්නො, චක්කවත්තී මහබ්බලො.

29. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා උදකදායකො ථෙරො ඉමා ගාථායො අභාසිත්ථාති.

උදකදායකත්ථෙරස්සාපදානං ඡට්ඨං.