9. සුකතාවෙළියත්ථෙරඅපදානං

43. ‘‘අසිතො නාම නාමෙන, මාලාකාරො අහං [අහුං (?)] තදා;

ආවෙළං පග්ගහෙත්වාන, රඤ්ඤො දාතුං වජාමහං.

44. ‘‘අසම්පත්තොම්හි [අසම්පත්තම්හි (සී.), අසම්පත්තොව (?)] රාජානං, අද්දසං සිඛිනායකං;

හට්ඨො හට්ඨෙන චිත්තෙන, බුද්ධස්ස අභිරොපයිං.

45. ‘‘එකත්තිංසෙ ඉතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

46. ‘‘පඤ්චවීසෙ ඉතො කප්පෙ, රාජාහොසිං මහබ්බලො;

වෙභාරො නාම නාමෙන, චක්කවත්තී මහබ්බලො.

47. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සුකතාවෙළියො ථෙරො ඉමා ගාථායො අභාසිත්ථාති.

සුකතාවෙළියත්ථෙරස්සාපදානං නවමං.