5. සීහාසනදායකත්ථෙරඅපදානං

21. ‘‘නිබ්බුතෙ ලොකනාථම්හි, පදුමුත්තරනායකෙ;

පසන්නචිත්තො සුමනො, සීහාසනමදාසහං.

22. ‘‘බහූහි ගන්ධමාලෙහි, දිට්ඨධම්මසුඛාවහෙ;

තත්ථ පූජඤ්ච කත්වාන, නිබ්බායති බහුජ්ජනො.

23. ‘‘පසන්නචිත්තො සුමනො, වන්දිත්වා බොධිමුත්තමං;

කප්පානං සතසහස්සං, දුග්ගතිං නුපපජ්ජහං.

24. ‘‘පන්නරසසහස්සම්හි, කප්පානං අට්ඨ ආසු තෙ [අට්ඨ ආසයුං (ක.)];

සිලුච්චයසනාමා ච, රාජානො චක්කවත්තිනො.

25. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සීහාසනදායකො ථෙරො ඉමා ගාථායො අභාසිත්ථාති;

සීහාසනදායකත්ථෙරස්සාපදානං පඤ්චමං.