7. යූථිකපුප්ඵියත්ථෙරඅපදානං

33. ‘‘චන්දභාගානදීතීරෙ, අනුසොතං වජාමහං;

සයම්භුං අද්දසං තත්ථ, සාලරාජංව ඵුල්ලිතං.

34. ‘‘පුප්ඵං යූථිකමාදාය, උපගච්ඡිං මහාමුනිං;

පසන්නචිත්තො සුමනො, බුද්ධස්ස අභිරොපයිං.

35. ‘‘චතුන්නවුතිතො කප්පෙ, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

36. ‘‘සත්තසට්ඨිම්හිතො කප්පෙ, එකො සාමුද්ධරො අහු;

සත්තරතනසම්පන්නො, චක්කවත්තී මහබ්බලො.

37. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා යූථිකපුප්ඵියො ථෙරො ඉමා ගාථායො අභාසිත්ථාති.

යූථිකපුප්ඵියත්ථෙරස්සාපදානං සත්තමං.