8. දුස්සදායකත්ථෙරඅපදානං

38. ‘‘තිවරායං පුරෙ රම්මෙ, රාජපුත්තොසහං [රාජපුත්තො අහං (සී. ස්‍යා.)] තදා;

පණ්ණාකාරං ලභිත්වාන, උපසන්තස්සදාසහං.

39. ‘‘අධිවාසෙසි භගවා, වත්ථං [නවං (ක.)] හත්ථෙන ආමසි;

සිද්ධත්ථො අධිවාසෙත්වා, වෙහාසං නභමුග්ගමි.

40. ‘‘බුද්ධස්ස ගච්ඡමානස්ස, දුස්සා ධාවන්ති පච්ඡතො;

තත්ථ චිත්තං පසාදෙසිං, බුද්ධො නො අග්ගපුග්ගලො.

41. ‘‘චතුන්නවුතිතො කප්පෙ, යං දුස්සමදදිං තදා;

දුග්ගතිං නාභිජානාමි, දුස්සදානස්සිදං ඵලං.

42. ‘‘සත්තසට්ඨිම්හිතො කප්පෙ, චක්කවත්තී තදා අහු;

පරිසුද්ධොති නාමෙන, මනුජින්දො මහබ්බලො.

43. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා දුස්සදායකො ථෙරො ඉමා ගාථායො අභාසිත්ථාති.

දුස්සදායකත්ථෙරස්සාපදානං අට්ඨමං.