8. ඵලකදායකත්ථෙරඅපදානං

37. ‘‘යානකාරො පුරෙ ආසිං, දාරුකම්මෙ සුසික්ඛිතො;

චන්දනං ඵලකං කත්වා, අදාසිං ලොකබන්ධුනො.

38. ‘‘පභාසති ඉදං බ්‍යම්හං, සුවණ්ණස්ස සුනිම්මිතං;

හත්ථියානං අස්සයානං, දිබ්බයානං උපට්ඨිතං.

39. ‘‘පාසාදා සිවිකා චෙව, නිබ්බත්තන්ති යදිච්ඡකං;

අක්ඛුබ්භං [අක්ඛොභං (සී.)] රතනං මය්හං, ඵලකස්ස ඉදං ඵලං.

40. ‘‘එකනවුතිතො කප්පෙ, ඵලකං යමහං දදිං;

දුග්ගතිං නාභිජානාමි, ඵලකස්ස ඉදං ඵලං.

41. ‘‘සත්තපඤ්ඤාසකප්පම්හි, චතුරො නිම්මිතාව්හයා;

සත්තරතනසම්පන්නා, චක්කවත්තී මහබ්බලා.

42. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ඵලකදායකො ථෙරො ඉමා ගාථායො අභාසිත්ථාති.

ඵලකදායකත්ථෙරස්සාපදානං අට්ඨමං.