15. ඡත්තවග්ගො

1. අතිඡත්තියත්ථෙරඅපදානං

1. ‘‘පරිනිබ්බුතෙ භගවති, අත්ථදස්සීනරුත්තමෙ;

ඡත්තාතිඡත්තං [ඡත්තාධිඡත්තං (සී.)] කාරෙත්වා, ථූපම්හි අභිරොපයිං.

2. ‘‘කාලෙන කාලමාගන්ත්වා, නමස්සිං ලොකනායකං [සත්ථු චෙතියං (සී.)];

පුප්ඵච්ඡදනං කත්වාන, ඡත්තම්හි අභිරොපයිං.

3. ‘‘සත්තරසෙ කප්පසතෙ, දෙවරජ්ජමකාරයිං;

මනුස්සත්තං න ගච්ඡාමි, ථූපපූජායිදං ඵලං.

4. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා අතිඡත්තියො [අධිඡත්තියො (සී. ස්‍යා.)] ථෙරො ඉමා ගාථායො අභාසිත්ථාති.

අතිඡත්තියත්ථෙරස්සාපදානං පඨමං.

2. ථම්භාරොපකත්ථෙරඅපදානං

5. ‘‘නිබ්බුතෙ ලොකනාථම්හි, ධම්මදස්සීනරාසභෙ;

ආරොපෙසිං ධජත්ථම්භං, බුද්ධසෙට්ඨස්ස චෙතියෙ.

6. ‘‘නිස්සෙණිං මාපයිත්වාන, ථූපසෙට්ඨං සමාරුහිං;

ජාතිපුප්ඵං ගහෙත්වාන, ථූපම්හි අභිරොපයිං.

7. ‘‘අහො බුද්ධො අහො ධම්මො, අහො නො සත්ථු සම්පදා;

දුග්ගතිං නාභිජානාමි, ථූපපූජායිදං ඵලං.

8. ‘‘චතුන්නවුතිතො කප්පෙ, ථූපසීඛසනාමකා;

සොළසාසිංසු රාජානො, චක්කවත්තී මහබ්බලා.

9. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ථම්භාරොපකො ථෙරො ඉමා ගාථායො අභාසිත්ථාති.

ථම්භාරොපකත්ථෙරස්සාපදානං දුතියං.

3. වෙදිකාරකත්ථෙරඅපදානං

10. ‘‘නිබ්බුතෙ ලොකනාථම්හි, පියදස්සීනරුත්තමෙ;

පසන්නචිත්තො සුමනො, මුත්තාවෙදිමකාසහං.

11. ‘‘මණීහි පරිවාරෙත්වා, අකාසිං වෙදිමුත්තමං;

වෙදිකාය මහං කත්වා, තත්ථ කාලඞ්කතො අහං.

12. ‘‘යං යං යොනුපපජ්ජාමි, දෙවත්තං අථ මානුසං;

මණී ධාරෙන්ති ආකාසෙ, පුඤ්ඤකම්මස්සිදං ඵලං.

13. ‘‘සොළසිතො කප්පසතෙ, මණිප්පභාසනාමකා;

ඡත්තිංසාසිංසු [බාත්තිංසාසිංසු (සී. ස්‍යා.)] රාජානො, චක්කවත්තී මහබ්බලා.

14. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා වෙදිකාරකො ථෙරො ඉමා ගාථායො අභාසිත්ථාති.

වෙදිකාරකත්ථෙරස්සාපදානං තතියං.

4. සපරිවාරියත්ථෙරඅපදානං

15. ‘‘පදුමුත්තරො නාම ජිනො, ලොකජෙට්ඨො නරාසභො;

ජලිත්වා අග්ගික්ඛන්ධොව, සම්බුද්ධො පරිනිබ්බුතො.

16. ‘‘නිබ්බුතෙ ච මහාවීරෙ, ථූපො විත්ථාරිකො අහු;

දූරතොව [අහොරත්තං (සී.), ථූපදත්තං (ස්‍යා.)] උපට්ඨෙන්ති, ධාතුගෙහවරුත්තමෙ.

17. ‘‘පසන්නචිත්තො සුමනො, අකං චන්දනවෙදිකං;

දිස්සති ථූපඛන්ධො ච [දීයති ධූමක්ඛන්ධො ච (සී.), දීයති ධූපගන්ධො ච (ස්‍යා.)], ථූපානුච්ඡවිකො තදා.

18. ‘‘භවෙ නිබ්බත්තමානම්හි, දෙවත්තෙ අථ මානුසෙ;

ඔමත්තං මෙ න පස්සාමි, පුබ්බකම්මස්සිදං ඵලං.

19. ‘‘පඤ්චදසකප්පසතෙ, ඉතො අට්ඨ ජනා අහුං;

සබ්බෙ සමත්තනාමා තෙ, චක්කවත්තී මහබ්බලා.

20. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සපරිවාරියො ථෙරො ඉමා ගාථායො අභාසිත්ථාති.

සපරිවාරියත්ථෙරස්සාපදානං චතුත්ථං.

5. උමාපුප්ඵියත්ථෙරඅපදානං

21. ‘‘නිබ්බුතෙ ලොකමහිතෙ [ලොකනාථම්හි (සී.)], ආහුතීනං පටිග්ගහෙ;

සිද්ධත්ථම්හි භගවති, මහාථූපමහො අහු.

22. ‘‘මහෙ පවත්තමානම්හි, සිද්ධත්ථස්ස මහෙසිනො;

උමාපුප්ඵං [උම්මාපුප්ඵං (සබ්බත්ථ)] ගහෙත්වාන, ථූපම්හි අභිරොපයිං.

23. ‘‘චතුන්නවුතිතො කප්පෙ, යං පුප්ඵමභිරොපයිං;

දුග්ගතිං නාභිජානාමි, ථූපපූජායිදං [පුප්ඵපූජායිදං (ස්‍යා.), බුද්ධපූජායිදං (ක.)] ඵලං.

24. ‘‘ඉතො ච නවමෙ කප්පෙ, සොමදෙවසනාමකා;

පඤ්චාසීතිසු රාජානො, චක්කවත්තී මහබ්බලා.

25. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා උමාපුප්ඵියො ථෙරො ඉමා ගාථායො අභාසිත්ථාති.

උමාපුප්ඵියත්ථෙරස්සාපදානං පඤ්චමං.

6. අනුලෙපදායකත්ථෙරඅපදානං

26. ‘‘අනොමදස්සීමුනිනො, බොධිවෙදිමකාසහං;

සුධාය පිණ්ඩං දත්වාන, පාණිකම්මං අකාසහං.

27. ‘‘දිස්වා තං සුකතං කම්මං, අනොමදස්සී නරුත්තමො;

භික්ඛුසඞ්ඝෙ ඨිතො සත්ථා, ඉමං ගාථං අභාසථ.

28. ‘‘‘ඉමිනා සුධකම්මෙන, චෙතනාපණිධීහි ච;

සම්පත්තිං අනුභොත්වාන, දුක්ඛස්සන්තං කරිස්සති’.

29. ‘‘පසන්නමුඛවණ්ණොම්හි, එකග්ගො සුසමාහිතො;

ධාරෙමි අන්තිමං දෙහං, සම්මාසම්බුද්ධසාසනෙ.

30. ‘‘ඉතො කප්පසතෙ ආසිං, පරිපුණ්ණෙ අනූනකෙ [පරිපුණ්ණො අනූනකො (ස්‍යා.)];

රාජා සබ්බඝනො නාම, චක්කවත්තී මහබ්බලො.

31. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා අනුලෙපදායකො ථෙරො ඉමා ගාථායො අභාසිත්ථාති.

අනුලෙපදායකත්ථෙරස්සාපදානං ඡට්ඨං.

7. මග්ගදායකත්ථෙරඅපදානං

32. ‘‘උත්තරිත්වාන නදිකං, වනං ගච්ඡති චක්ඛුමා;

තමද්දසාසිං සම්බුද්ධං, සිද්ධත්ථං වරලක්ඛණං.

33. ‘‘කුදාල [කුද්දාල (සී. ස්‍යා.)] පිටකමාදාය, සමං කත්වාන තං පථං;

සත්ථාරං අභිවාදෙත්වා, සකං චිත්තං පසාදයිං.

34. ‘‘චතුන්නවුතිතො කප්පෙ, යං කම්මමකරිං තදා;

දුග්ගතිං නාභිජානාමි, මග්ගදානස්සිදං ඵලං.

35. ‘‘සත්තපඤ්ඤාසකප්පම්හි, එකො ආසිං ජනාධිපො;

නාමෙන සුප්පබුද්ධොති, නායකො සො නරිස්සරො.

36. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා මග්ගදායකො ථෙරො ඉමා ගාථායො අභාසිත්ථාති.

මග්ගදායකත්ථෙරස්සාපදානං සත්තමං.

8. ඵලකදායකත්ථෙරඅපදානං

37. ‘‘යානකාරො පුරෙ ආසිං, දාරුකම්මෙ සුසික්ඛිතො;

චන්දනං ඵලකං කත්වා, අදාසිං ලොකබන්ධුනො.

38. ‘‘පභාසති ඉදං බ්‍යම්හං, සුවණ්ණස්ස සුනිම්මිතං;

හත්ථියානං අස්සයානං, දිබ්බයානං උපට්ඨිතං.

39. ‘‘පාසාදා සිවිකා චෙව, නිබ්බත්තන්ති යදිච්ඡකං;

අක්ඛුබ්භං [අක්ඛොභං (සී.)] රතනං මය්හං, ඵලකස්ස ඉදං ඵලං.

40. ‘‘එකනවුතිතො කප්පෙ, ඵලකං යමහං දදිං;

දුග්ගතිං නාභිජානාමි, ඵලකස්ස ඉදං ඵලං.

41. ‘‘සත්තපඤ්ඤාසකප්පම්හි, චතුරො නිම්මිතාව්හයා;

සත්තරතනසම්පන්නා, චක්කවත්තී මහබ්බලා.

42. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ඵලකදායකො ථෙරො ඉමා ගාථායො අභාසිත්ථාති.

ඵලකදායකත්ථෙරස්සාපදානං අට්ඨමං.

9. වටංසකියත්ථෙරඅපදානං

43. ‘‘සුමෙධො නාම නාමෙන, සයම්භූ අපරාජිතො;

විවෙකමනුබ්‍රූහන්තො, අජ්ඣොගහි මහාවනං.

44. ‘‘සළලං පුප්ඵිතං දිස්වා, ගන්ථිත්වාන [බන්ධිත්වාන (සී.)] වටංසකං;

බුද්ධස්ස අභිරොපෙසිං, සම්මුඛා ලොකනායකං.

45. ‘‘තිංසකප්පසහස්සම්හි, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

46. ‘‘ඌනවීසෙ කප්පසතෙ, සොළසාසුං සුනිම්මිතා;

සත්තරතනසම්පන්නා, චක්කවත්තී මහබ්බලා.

47. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා වටංසකියො ථෙරො ඉමා ගාථායො අභාසිත්ථාති.

වටංසකියත්ථෙරස්සාපදානං නවමං.

10. පල්ලඞ්කදායකත්ථෙරඅපදානං

48. ‘‘සුමෙධස්ස භගවතො, ලොකජෙට්ඨස්ස තාදිනො;

පල්ලඞ්කො හි මයා දින්නො, සඋත්තරසපච්ඡදො.

49. ‘‘සත්තරතනසම්පන්නො, පල්ලඞ්කො ආසි සො තදා;

මම සඞ්කප්පමඤ්ඤාය, නිබ්බත්තති සදා මම.

50. ‘‘තිංසකප්පසහස්සම්හි, පල්ලඞ්කමදදිං තදා;

දුග්ගතිං නාභිජානාමි, පල්ලඞ්කස්ස ඉදං ඵලං.

51. ‘‘වීසකප්පසහස්සම්හි, සුවණ්ණාභා තයො ජනා;

සත්තරතනසම්පන්නා, චක්කවත්තී මහබ්බලා.

52. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පල්ලඞ්කදායකො ථෙරො ඉමා ගාථායො අභාසිත්ථාති.

පල්ලඞ්කදායකත්ථෙරස්සාපදානං දසමං.

ඡත්තවග්ගො පන්නරසමො.