6. චම්පකපුප්ඵියත්ථෙරඅපදානං

41. ‘‘කණිකාරංව ජොතන්තං, නිසින්නං පබ්බතන්තරෙ;

ඔභාසෙන්තං දිසා සබ්බා, ඔසධිං විය තාරකං [ඔසධී විය තාරකා (ක.)].

42. ‘‘තයො මාණවකා ආසුං, සකෙ සිප්පෙ සුසික්ඛිතා;

ඛාරිභාරං ගහෙත්වාන, අන්වෙන්ති මම පච්ඡතො.

43. ‘‘පුටකෙ සත්ත පුප්ඵානි, නික්ඛිත්තානි තපස්සිනා;

ගහෙත්වා තානි ඤාණම්හි, වෙස්සභුස්සාභිරොපයිං.

44. ‘‘එකත්තිංසෙ ඉතො කප්පෙ, යං පුප්ඵමභිරොපයිං;

දුග්ගතිං නාභිජානාමි, ඤාණපූජායිදං ඵලං.

45. ‘‘එකූනතිංසකප්පම්හි, විපුලාභ [විහතාභා (ස්‍යා.)] සනාමකො;

සත්තරතනසම්පන්නො, චක්කවත්තී [රාජා හොසි (ක.)] මහබ්බලො.

46. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා චම්පකපුප්ඵියො ථෙරො ඉමා ගාථායො අභාසිත්ථාති;

චම්පකපුප්ඵියත්ථෙරස්සාපදානං ඡට්ඨං.