(30) සීහහනුලක්ඛණං

238. ‘‘යම්පි, භික්ඛවෙ, තථාගතො පුරිමං ජාතිං පුරිමං භවං පුරිමං නිකෙතං පුබ්බෙ මනුස්සභූතො සමානො සම්ඵප්පලාපං පහාය සම්ඵප්පලාපා පටිවිරතො අහොසි කාලවාදී භූතවාදී අත්ථවාදී ධම්මවාදී විනයවාදී, නිධානවතිං වාචං භාසිතා අහොසි කාලෙන සාපදෙසං පරියන්තවතිං අත්ථසංහිතං. සො තස්ස කම්මස්ස කටත්තා…පෙ… සො තතො චුතො ඉත්ථත්තං ආගතො සමානො ඉමං මහාපුරිසලක්ඛණං පටිලභති, සීහහනු හොති.

‘‘සො තෙන ලක්ඛණෙන සමන්නාගතො සචෙ අගාරං අජ්ඣාවසති, රාජා හොති චක්කවත්තී…පෙ… රාජා සමානො කිං ලභති? අප්පධංසියො හොති කෙනචි මනුස්සභූතෙන පච්චත්ථිකෙන පච්චාමිත්තෙන. රාජා සමානො ඉදං ලභති… බුද්ධො සමානො කිං ලභති? අප්පධංසියො හොති අබ්භන්තරෙහි වා බාහිරෙහි වා පච්චත්ථිකෙහි පච්චාමිත්තෙහි, රාගෙන වා දොසෙන වා මොහෙන වා සමණෙන වා බ්‍රාහ්මණෙන වා දෙවෙන වා මාරෙන වා බ්‍රහ්මුනා වා කෙනචි වා ලොකස්මිං. බුද්ධො සමානො ඉදං ලභති’’. එතමත්ථං භගවා අවොච.

239. තත්ථෙතං වුච්චති –

‘‘න සම්ඵප්පලාපං න මුද්ධතං [බුද්ධතන්ති (ක.)],

අවිකිණ්ණවචනබ්‍යප්පථො අහොසි;

අහිතමපි ච අපනුදි,

හිතමපි ච බහුජනසුඛඤ්ච අභණි.

‘‘තං කත්වා ඉතො චුතො දිවමුපපජ්ජි,

සුකතඵලවිපාකමනුභොසි;

චවිය පුනරිධාගතො සමානො,

ද්විදුගමවරතරහනුත්තමලත්ථ.

‘‘රාජා හොති සුදුප්පධංසියො,

මනුජින්දො මනුජාධිපති මහානුභාවො;

තිදිවපුරවරසමො භවති,

සුරවරතරොරිව ඉන්දො.

‘‘ගන්ධබ්බාසුරයක්ඛරක්ඛසෙභි [සුරසක්කරක්ඛසෙභි (ස්‍යා.)],

සුරෙහි න හි භවති සුප්පධංසියො;

තථත්තො යදි භවති තථාවිධො,

ඉධ දිසා ච පටිදිසා ච විදිසා චා’’ති.